Lơ̆m pơyan Têt Nguyên đăn Quý Mão 2023 păng ƀơ̆t tơbăt 93 xơnăm 'Năr tơ-iung pơjing Đảng, kiơ̆ juăt jue kơ hơdrung hơdrĕch, năr 11/1, tơ̆ pơlei tơm Hồ Chí Minh, Kơdră teh đak bơ̆n Nguyễn Xuân Phúc hlôi truh plang pơkao, hlôt nhang ăn kơ Ƀok Kơdră Hồ Chí Minh; năm apong, axong tơmam, thơ thâu Têt hăm unh hnam đe Kơdră Đảng păng Khul Kơpal teh đak hlôi lôch hơchăng.  

Plang hlôt nhang, plang pơkao tơ̆ Anih Pơdăh, Kơdră teh đak bơ̆n Nguyễn Xuân Phúc păng Khul Kơpal 'măn minh pơnĭt vă ƀlŏk hơdơ̆r kơ Ƀok Kơdră Hồ Chí Minh – Bơngai nuih mơng tơblăh pơrơngei hơdrung hơdrĕch – Bơngai chih pơđơk gơh rơgei hloh kơ hơdrung bơngai Việt Nam. Tơƀôh đon bơnôh kŭp yom kăp gĭt hăm Ƀok Kơdră Hồ Chí Minh – hlôi plang đĭ hnưr erih po ăn tơdrong tơblăh pơrơngei hơdrung hơdrĕch, rơngei teh đak, tơ-iung pơjing Teh đak Việt Nam xăh hô̆i chuh nghĩa rơngei pơgơ̆r kơdih, hiôk hian. Truh plang hlôt nhang hăm ƀok Đại tướng Lê Đức Anh, Kơdră teh đak bơ̆n đơ̆ng xơnăm 1992-1997, Kơdră teh đak bơ̆n Nguyễn Xuân Phúc ră hơdăh, mă hăm kơchư̆k jang yơ, ƀok Lê Đức Anh duh akŏm tơdrong tơnăp, tơgop lơ nơ̆r kăp gĭt lơ̆m dôm tơdrong jang kăl kơ teh đak.