Tơdrong rơgei kơ bơngai mơlôh văn hŏk Nguyễn Bình kŭp yom kơyuơ đei Kơdră teh đak bơ̆n Nguyễn Xuân Phúc hơlêm, tơƀôh tơdrong tơrĕk tơgŭm đơ̆ng Đảng, Khul kơpal teh đak păng tơ 'ngla Ƀok Kơdră teh đak hăm đe mơlôh. Nguyễn Bình pơtơm chih văn đơ̆ng pơtơm 8 xơnăm, chă hŏk hơlen kơdih păng truh dang ei hlôi kloh klĕch găh lơ nơ̆r pơma, lơ̆m noh đei hloi nơ̆r pơma xo xĕch lơ̆m kơpal teh, vă tơblơ̆ nơ̆r tak phâm văn hŏk mă đe ư ang gơh trŏ hăm tơdrong chih tơm kơ dôm bơngai chih đơ̆ng lơ anglŏ xơnăm adrol ki.

Nguyễn Bình dang ei oei răk vei minh ƀar tơdrong vă jang văn hŏk, lơ̆m noh 'meh chih găh tơdrong tơroi kơ Việt Nam vă đơ̆ng noh tơbang um ai, teh đak, kon bơngai Việt Nam, lơ̆m noh đei dôm bơngai mă đe ư ang lơ̆m hnưr erih kơ Việt Nam, tơbang lơ̆m apŭng plenh teh. Tơ̆ jơ tơjrâ̆m, Kơdră teh đak bơ̆n Nguyễn Xuân Phúc 'meh vă Nguyễn Bình pơtoi hŏk hơlen, đei lơ tak phâm 'lơ̆ng, đei kơjă kăp gĭt, tơgop ăn văn hŏk teh đak adoi nhen pơtoi tơbang um ai, joh ayŏ erih xa, kon bơngai Việt Nam vă apŭng plenh teh băt truh.