Xơnăm âu, Anih tơm Pơtho Pơhrăm pơtruh 7 khul hŏk tro rơgei kơ teh đak Việt Nam hăm 38 'nu hŏk tro năm pơlong Olympic lơ̆m tơring păng lơ̆m kơpal teh. Mă hơtuch đei 100% hŏk tro Việt Nam năm pơlong adoi đei iŏk jơnei. 

Rim Khul Việt Nam pơtoi oei lơ̆m top 10 t/đ đei jơnei kơjung hloh hăm lơ hŏk tro đei iŏk kơsô̆ điểm kơjung hloh. Kăp gĭt pôk 10 tŏ Mê đai Pơm jang tăl mă Ƀar, 7 tŏ Mê đai Pơm jang tăl mă Pêng ăn đe hŏk tro đei iŏk jơnei kơjung hloh ăh 'măng pơlong Olympic păng đei jơnei Pơlong khua hŏk kih thuơ̆t apŭng plenh teh xơnăm 2022, pơma ăh jơ tơjrâ̆m, Kơdră teh đak bơ̆n Nguyễn Xuân Phúc chơt hơ iă đei tơƀơ̆p đe hŏk tro 'nhăk tơdrong pơ ư pơ ang ăn Teh đak. Kơdră teh đak Nguyễn Xuân Phúc ră hơdăh, tơdrong juăt jue kơ hơdrung hơdrĕch bơ̆n hơnơ̆ng tơrĕk truh tơdrong rong 'me păng pơtho pơhrăm bơngai rơgei. Đảng, Khul Kơpal teh đak bơ̆n hơnơ̆ng xơkơ̆t, Pơtho pơhrăm jing trong jang kăl mă blŭng, păng axong lơ tơdrong pran vă axong hơtŏk tơdrong jang pơtho pơhrăm.