Tơ̆ jơ lêh, ƀok Kơdră teh đak bơ̆n Võ Văn Thưởng ră hơdăh, găn ga 60 xơnăm, VCCI hlôi kơ 'nôh keh đang rim xơnong jang đei pơjao, hơtŏk tơdrong pran kơ jơnŭm jang mŭk drăm păng khul bơngai jang mŭk drăm. Đơ̆ng noh tơgop ăn tơdrong hơtŏk tơ-iung kơ teh đak. Khei năr truh, Kơdră teh đak bơ̆n pơkăl, VCCI păng jơnŭm jang mŭk drăm, bơngai jang mŭk drăm athei pơjing jơhngơ̆m pran kơ hơnăn Việt lơ̆m tơring tĕch răt, jang hadoi lơ̆m kơpal teh đei jơnei keh kong pơih xă tơguăt hăm teh đak vang jang lơ̆m kơpal teh kiơ̆ pơkăp atŭm đei iŏk jơnei. Rim bơngai jang mŭk drăm athei băt hơdăh xơnong jang lơ̆m jơnŭm tơguăt tơguăl kon pơlei, hơtŏk tơdrong tơguăt kon pơlei, jang hadoi đe kŏng nhơ̆n, bơngai jang mir păng bơngai hŏk kơjung, hăm tơdrong pơgơ̆r đơ̆ng Đảng kơyuơ tơdrong tơchơ̆t kon pơlei pơdrŏng, teh đak pran kơtang, rơngei, gơh rơgei. Kơdră teh đak tơrĕk, bơngai jang mŭk drăm athei pơm kiơ̆ ƀlep khôi luơ̆t, hơnơ̆ng xơkơ̆t tơdrong pơyua kơ anih jang mŭk drăm, pơyua kơdih hăm tơdrong pơyua kơ teh đak, pơyua ăn kon pơlei pơla.