Tơ̆ anih ‘măn um Ƀok Kơdră Hồ Chí Minh, Kơdră teh đak bơ̆n Võ Văn Thưởng păng khul kơpal hlôi chih nơ̆r ƀlŏk tơbăt kơ Ƀok, tơbang đon bơnôh hmach bơnê kơ tơdrong plang đơ̆ng Ƀok Kơdră gơh hơgei, bơngai Thâi nuih mơng kơ kĕch mang Việt Nam, đĭ hnưr hơrih plang ăn tơdrong rơngei hiôk hian kơ teh đak, tơdrong jơnap ăn kon pơlei. Lán Nà Nưa oei lơ̆m tơring bri Nà Nưa, tơ̆ thôn Tân Lập, xah Tân Trào, apŭng Sơn Dương, anih mă Ƀok Hô hlôi oei, pơm jang đơ̆ng hơtuch khei 5 truh năr  22-8-1945 vă pơgơ̆r Tơdrong iung tơjră Khei 8 đei jơnei pơgơ̆r kơdih lơ̆m jâ̆p teh đak, vă truh năr 2/9/1945, ƀok Kơdră HCM đŏk tơbang hla bar Tơchơ̆t rơngei hiôk hian, tơ-iung pơjing teh đak Việt Nam Dân chủ Cộng hòa.

Pơtoi kơ noh, ƀok Kơdră teh đak bơ̆n Võ Văn Thưởng păng khul kơpal plang hlôt nhang tơ̆ Anih soi ƀlŏk Tân Trào, jing anih pơgơ̆r Hop akŏm tôm kon pơlei, anih pơtơm kơ Kuôk hô̆i Việt Nam hrei âu.