Lơ̆m kơthơ đei trong chih: “Têt Trung thu đơ̆ng sơ̆ truh dang ei đĭ jing tơdrong juăt ‘lơ̆ng ưh đei thĭu lơ̆m tơdrong juăt joh ayŏ kơ dŏ xoang kơ bơngai Việt Nam. ‘Nâu jĭ jơnăr vă đe kôn mon, kon sâu ngôi pơchơt, oei xa hơdai hăm hnam tơnŏ păng bôl boăl. Đảng, teh đak păng đĭ đăng tơpôl hơnơ̆ng ‘măn tơdrong tơrek dêh hlŏh ăn kon mon, hơnơ̆ng pơjing tơdrong ‘lơ̆ng hlŏh vă đe kon mon đei hŏk pơhrăm, ngôi pơchơt sơđơ̆ng păng tih vơ̆ djơ̆ ‘lơ̆ng.

Mih hơpơi kơ kôn mon kon sâu hơnơ̆ng vei kơjăp jơhngâm đon adrin hŏk, băt chu yom, mêm băl, tơgŭm băl yak tŏk, hlôh vao gơ̆h hơgei, vang tơgop jơhngâm pơjing teh đak Việt Nam ‘mêm kơ eng kơ đĭ đăng bơ̆n roi đunh roi pơdrŏng, ‘lơ̆ng rŏ, gơ̆h hơgei. Ƀlep ƀât Têt Trung thu sơnăm 2025, Mih pơtruh ăn đĭ đăng kôn mon kon sâu đon ‘mêm kơeng, đon hơmĕng.

Thơ thou ăn đe kon mon 1 pơyan Trung thu chơt hơiă ‘nă hal, hiôk chơt hăm hnam tơnŏ, thây kô păng bôl boăl. Mih hơpơi kơ đe kôn mon kon sâu ưh đei pŭn ai, đe kon mon tơ̆ tơring đak lơ̆p hơnơ̆ng adrin, ưh đei kơdŭn tơ̆ hơnăp dôm tơdrong pơmat tat; đe kon mon athei hơnơ̆ng vei kơjăp ƀơ̆r hiĕk chơt hơiă, tưk tơiung tơdrong hơpơi ‘mĕh đơ̆ng kơdih, vă đơ̆ng rŏng kơ ‘mi kial tơdrong arih xa gơ̆h ‘lơ̆ng hơiă, hiôk chơt dơ̆ng!”