Pơma tơ̆ hop akŏm, Kơdră teh đak Lương Cường akhan, dang ei, oei pă hlŏh 1 khei dơ̆ng ‘nŏh tôch sơnăm 2025, hăm khei năr pă tŏ sĕt thoi noh, tơdrong jang oei tôch lơ. Yoa thoi noh, Anih pơvih pơvăn athei adrin, hơmet mă ‘lơ̆ng rim tơdrong, tơlĕch trong jang mă ‘lơ̆ng, trŏ hăm tơdrong hơgăt; dôm hơyak pơgơ̆r iŏk nơ̆r nơ̆r tơgop găh tơdrong jang đei ‘nŏh jĭ ‘long pơtŏ tôch trŏ.

Atŭm hăm ‘nŏh hơnơ̆ng tưk tơiung đon jang tơnăp, vang jang hơdoi hrơ̆ch ‘lơ̆ng hăm dôm anih đei ƀơm truh vă hơlen năng rim tơdrong, kơchăng roi tơƀôh, hơlen năng rim tơdrong tam mă lăp ‘lơ̆ng lơ̆m tơdrong jang. Kŭm hăm ‘nŏh, Anih pơvih ăn ƀok Kơdră teh đak akŏm jơhngâm pơgơ̆r mă ‘lơ̆ng hop akŏm pơtôch tơdrong jang lơ̆m sơnăm 2025, tơlĕch tơdrong jang sơnăm 2026; lơ̆m noh athei hơlen năng rim tơdrong jang đei păng dôm tơdrong tam mă pran ‘lơ̆ng vă hơmet ming trong jang, pơgơ̆r bơ̆ jang roi đei yoa ‘lơ̆ng tơ̆ tơnăp kơnh.