‘Măng năm ngôi ‘măng âu đơ̆ng Ƀok pơtao Brunei tơƀôh hơdăh đon pơ hnŏng đơ̆ng 2 teh đak ưh kơ pơdơh hơmet ming, pơm ‘lơ̆ng tơdrong pơvei tơbôl păng jang hơdai lơ̆m đĭ đăng rim tơdrong jang, đơ̆ng rŏng kơ hlôi hơtŏk tơdrong pơvei 2 pang tŏk Jang hơdai Tôm tơdrong. Hơdai hăm ‘măng năm ngôi tơƀôh tơdrong lăng kăl păng tơdrong tơbôl kơjăp Brunei ‘măn ăn Việt Nam, nhen 1 teh đak jang hơdai lui ngeh lơ̆m ASEAN.

Lơ̆m khei ‘năr pơvei Jang hơdai tôm tơdrong Việt Nam-Brunei hơtŏk tơiung ‘lơ̆ng hơiă, ‘măng năm ngôi tơ̆ Việt Nam đơ̆ng Ƀok pơtao Brunei hơnơ̆ng tơgop hơmet ming păng pơm ‘lơ̆ng hloh dơ̆ng lui ngeh chĭnh trĭ, pơtrŭt jang hơdai lơ tơdrong đơ̆ng 2 teh đak, lơ̆m noh đei chĭnh trĭ - jang tơbôl, khŭl lĭnh - vei sơđơ̆ng, mŭk drăm, tĕch mơdro, tơmơ̆t jên jang, pơtho pơhrăm, joh ayŏ, Halal, tơbơ̆p pơma dơnuh đơ̆ng kon pơlei... Đơ̆ng rŏng lêh sơng, Kơdră teh đak Lương Cường păng Ƀok pơtao Brunei chĕp kơ̆l Khŭl kơdră kơpal 2 teh đak pơgơ̆r pơma đam, hơlen lăng pơtôch jang hơdai đơ̆ng 2 teh đak khei ‘năr âu ki păng tơlĕch dôm trong jang hơdai tơ̆ hơnăp kơnh.