Tơ̆ jơ tơƀâp, 2 ‘nu ƀok kơdră chơt hơiă hăm dôm hơyak tŏk pran ‘lơ̆ng lơ̆m tơdrong pơvei Việt Nam – Czech lơ̆m lơ tơdrong, ‘moi kiơ̆ đon lui băl găh chinh trĭ tôch kơjăp. Jên tĕch mơdro tơmam đơ̆ng 2 pang tŏk lơ, đei 2 ti USD sơnăm 2024 păng 1,9 ti USD lơ̆m 10 khei sơnăm 2025, mă lei tam mă tơgăl hăm tơdrong pran ‘lơ̆ng đơ̆ng 2 teh đak. Ƀar păh oei đei lơ tơdrong ‘lơ̆ng vă atŏk jên tĕch mơdro 2 pang, tưk tơiung tơdrong tơmât jên jang xa păng jang hơdoi găh lơ tơdrong nai dơ̆ng.

Kơdră teh đak Lương Cường athei anih chih pơjing luơ̆t kơ 2 teh đak hơnơ̆ng jang hơdoi vă chih pơjing luơ̆t lăp ‘lơ̆ng pơyoa ăn tơdrong pơvei jang hơdoi 2 pang, pơm lăp hăm tơdrong đei yoa atŭm đơ̆ng 2 teh đak, vang tơgop ăn tơdrong rơngei, sơđơ̆ng, jang hơdoi păng jang tŏk tơ̆ tơring păng lơ̆m apŭng plenh teh.