Bơngai tăh hla păng kon pơlei apŭng Thường Xuân athei đei trong jang hơdrô̆ ăn apŭng groi kông gơh vei dơ̆ng 1,2 tơdrong jang tơgŭm mưh đĭ klăih đơ̆ng dơnuh hin dăh mă jang đang tơring tơrang ‘nao 5 - 10 sơnăm dơ̆ng. Bơngai tăh hla ‘meh vă Quốc hội set hơlen hơmet ming, tơmơ̆t dơ̆ng trong jang, tơdrong tơgŭm ăn 1,2 ‘nu hơioh, kon pơlei lĭnh bơngai kon kông.

Pơma hơdăh Khŭl tang măt Quốc hội dêh char Thanh Hoá gô hơnơ̆ng chih iŏk tôm vă akŏm tơroi tơbăt hăm Quốc hội, Khŭl kơdră teh đak, dôm Anih tơm, Anih jang Trung ương đei ƀơm truh vă hơnơ̆ng tơchĕng hơlen, set hơlen hơmet pơ ‘lơ̆ng. Dôm nơ̆r apĭnh găh tơdrong gơh hơmet pơ ‘lơ̆ng đơ̆ng tơring, Kơdră teh đak athei dôm kơdră chĕp kơ̆l dêh char, kơdră chĕp kơ̆l apŭng chih iŏk set hơlen, hơmet pơ ‘lơ̆ng kiơ̆ tơdrong gơh jang đơ̆ng kơdih tơ̆ hơnăp kơnh hrôih hloh, pơm lăp hăm ‘meh vă trŏ ƀlep đơ̆ng bơngai tăh hla păng Kon pơlei apŭng Thường Xuân. Ƀlep ƀơ̆t ‘măng âu, Grŭp jang kơmăy kơmŏk viễn thông khŭl lĭnh Viettel păng Anih mong jên Mơdro sa khŭl lĭnh hlôi pơjao asong 6 ti hlak jên vă man 100 tŏ hnam ăn kơ dôm ŭnh hnam mơmat tat găh hnam oei tơ̆ apŭng Thường Xuân.