Kơdră teh đak Lương Cường vang truh Hop akŏm Kơdră kơpal APEC hơdai hăm năm ngôi tơ̆ Hàn Quốc ‘măng âu đei tơdrong ‘lơ̆ng gĭt kăl, tơƀôh tơdrong tơgŭm hăm tơ ‘ngla hnam APEC hai tơgop hơmet ming pơvei Jang hơdai gĭt kăl tôm tong Việt-Hàn hai. Hơdai hăm hơnơ̆ng tơƀôh hơdăh tơdrong tơgop ‘lơ̆ng, tơnăp đơ̆ng Việt Nam lơ̆m tơdrong hơmet pơ ‘lơ̆ng dôm tơdrong lơ̆m tơring păng jơ̆p plei teh, mă loi ‘noh jĭ pơtrŭt tơdrong jang hơdai mŭk drăm apŭng plĕnh teh, pơm tơdrong ‘lơ̆ng ‘nao ăn mŭk drăm tŏk kơ tơring.

Việt Nam gô iŏk pơgơ̆r sơnăm APEC 2027, tơdrong jang âu đei lăng ‘noh ‘măng vă Việt Nam pơtrŭt tơlĕch jang Trĕng lăng APEC truh sơnăm 2040 mă Việt Nam hlôi tơlĕch ăn blŭng a păng vang jang pơjing hơdai hăm dôm teh đak jang lơ̆m khŭl đơ̆ng sơnăm 2017. Hơdai hăm ‘noh jĭ tơdrong hiôk vă teh đak bơ̆n roi tơƀôh um rup teh đak tơplih ‘nao, hơbĕch hơbal, hơtŏk tơiung pran kơtang; đơ̆ng noh tŭn pran jang tơbôl mŭk drăm păng joh ayŏ, hơtŏk ‘lơ̆ng anih dơ̆ng lơ̆m tơring păng lơ̆m apŭng plĕnh teh.