‘Nâu jĭ ‘măng vă rim Kơdră chĕp kơ̆l APEC tơƀơ̆p, pơma dơnuh kŭm hăm bơngai tang măt kơdră chĕp kơ̆l gĭt kăl kơ rơbâu anih mơdro sa tih hloh châu Á - Thái Bình Dương găh dôm trong jang hơtŏk tơiung ‘nao, tơdrong hiôk păng long nol tơlĕch ăn hăm tơring păng tơlĕch ăn đon tơchĕng, trong jang ‘lơ̆ng ăn jang hơdai păng hơtŏk tơiung.

Pơma tơ̆ Hop akŏm, Kơdră teh đak Lương Cường  pơma hơdăh tơpôl mơdro sa gơh tơgop đei yua lơ̆m 1,2 tơdrong, ‘noh jĭ tơdrong iung jang hơdrol tơplih ‘nao tơdrong jang tĕch mơdro, pơm tơlĕch kiơ̆ trong rơgoh, ‘lơ̆ng, tơplih kơsô̆...; hơtŏk loi dơ̆ng tơmơ̆t jên jang ăn tơchĕng hơlen păng hơtŏk tơiung, pơtrŭt tơdrong hơtŏk tơiung păng iŏk yua dôm kơ loăi kơmăy kơmŏk ‘nao vă tơchă nơ̆r tơblang ăn dôm tơdrong kăl đơ̆ng apŭng plĕnh teh. Kơdră teh đak Lương Cường pơma hơdăh Việt Nam hơdrin dôm tơdrong kăl, đon tơchĕng kơjăp, ‘lơ̆ng găh rơngei, pơm tơm kơdih, hơdrin kơdih, jang lơ trong, yua kơ tơdrong rơngei, jang hơdai păng hơtŏk tơiung.