Kơsơ̆ năr 19/12, tơ̆ Hà Nội, Khul Linh Gre păr kăp gĭt pơm lêh Akŏm tơbăt 50 xơnăm đei iŏk Jơnei “Hà Nội - Điện Biên Phủ tơ̆ phô̆t phông” păng xơng Ƀok Kơdră teh đak truh apong, bơ̆ jang tơ̆ Anih linh gre păr truh ăh 'măng tơbăt 78 xơnăm 'Năr tơ iung pơjing Khul Linh kon pơlei Việt Nam păng 33 xơnăm 'Năr akŏm Tôm kon pơlei vei xơđơ̆ng tơpôl teh đak.

Pơma ăh jơ tơjrâ̆m, Kơdră teh đak bơ̆n Nguyễn Xuân Phúc ră hơdăh, tơdrong đei jơnei Hà Nội - Điện Biên Phủ tơ̆ phô̆t phông tơƀôh trong jang chĭn trĭ, pơm jang găh linh trŏ ƀlep đơ̆ng Đảng bơ̆n, khul linh bơ̆n, jing tơdrong đei jơnei kơ jơhngơ̆m pran chĭn trĭ, đon bơnôh kơ tôm kon pơlei Việt Nam; jing jơhngơ̆m pran khŏm mă tơblăh tơpăi đei jơnei ayăt Mih tơgar. Đơ̆ng đei jơnei âu, Kơdră teh đak Nguyễn Xuân Phúc akhan, đei lơ ƀai hŏk kăp gĭt kăl đei iŏk yua rơgei lơ̆m tơdrong tơ iung pơjing păng vei lăng teh đak hrei âu.  

Pôk bơnê hăm dôm tơdrong jang rơgei đơ̆ng Anih linh gre păr lơ̆m jê̆ 60 xơnăm kơ âu, Kơdră teh đak duh tơroi kơ dôm tơdrong tơnap tap lơ̆m tơdrong tơ iung pơjing păng vei lăng teh đak hrei âu, atŭm hăm noh pơkăl Anih linh gre păr iŏk yua tơdrong juăt jue nuih mơng, tơrĕk tơ iung pơjing khul linh tơpă pran kơtang găh kon bơngai păng phao kơtuang, kơmăi kơmŏk, iŏk pơ-'lơ̆ng kon bơngai jing tơm – dơnơm xơkơ̆t truh tơdrong đei jơnei xơnong vei lăng teh đak.