Sơng păng bơ̆ jang hăm Kơdră tĕh đak păng Khul tang măt đei Kơdră chĕp kơ̆l dêh char Gyeonggi Kim Dong-yeon păng lơ kuan tih jang tơ bôl, dêh char Gyeonggi păng pơlei tơm (plt) Gwangju. Gyeonggi ‘nŏh jĭ dêh char dơ̆ng hơdrol kơ Hàn Quốc găh kơsô̆ kon pơlei, dơ̆ng mă 5 găh tĕh xăh. Dêh char đei 28 plt păng 3 apŭng, tơring kơdrâm tơm ‘nŏh jĭ plt Suwon. Kăl loi ‘nâu kŭm jing pơlei mă 2 kơdang 37 rơbâu ‘nu bơngai Việt; lơ̆m nŏh đei dang 3.000 ‘nu bơngai Việt hăm hlŏh 500 unh hnam Việt - Hàn oei arih xa tơ̆ plt Gwangju.

Tơ̆ jơ bơ̆ jang, Kơdră tĕh đak Nguyễn Xuân Phúc athei kơdră chĕp kơ̆l dêh char Gyeonggi, plt Gwangju păng khul kơdră tơ ring hơtŏk tơdrong pơlung anih tĕch mơdro tơ̆ dêh char pơih xă tơdrong jang sa, tơmât jên jang xa, tĕch mơdro lơ̆m rim tơdrong tơ̆ dôm tơring tơ̆ tĕh đak Việt Nam, tơgŭm, roi tơbăt dôm tơdrong kăl ăn dôm tơring păih Việt Nam lơ̆m tơdrong pơm hla ar vei lăng, tơprŏh trong jang tŏk tơdrong chă tơmang lăng, set hơlen sơng iŏk lơ ƀiơ̆ bơngai jang đơ̆ng Việt Nam; hơnơ̆ng ‘măn tơdrong tơrĕk, tơgŭm hăm tơpôl bơngai Việt tơ̆ tơring.

Gơmăng lơ̆m năr ‘nâu mơ̆n, Kơdră tĕh đak Nguyễn Xuân Phúc păng Khul tang măt ăn Việt Nam lĕch đơ̆ng dêh char Gyeonggi, năm tơ̆ cham gre păr khul linh tơ̆ anih tơm Seoul, păr vih tơ̆ tĕh đak, pơtôch ‘lơ̆ng hơiă ‘măng năm hơpong tơ̆ tĕh đak Hàn Quốc.