Pơgê ‘năr 6/12, đơ̆ng rŏng kơ vang Hop akŏm anih jang mơdro sa Việt Nam - Hàn Quốc tơ̆ Anih tơm Seoul hăm hloh 500 ‘nu tang măt truh đơ̆ng dôm anih jang mơdro sa kơ 2 teh đak, Kơdră teh đak Nguyễn Xuân Phúc hlôi pơgơ̆r jơ pơma đam hăm dôm grŭp jang, anih jang mơdro sa tih kơ Hàn Quốc lơ̆m tơdrong jang jên hu - anih mong jên. Tơ̆ pơma đam, Kơdră teh đak pơma hơdăh,Việt Nam ling lang lăng Hàn Quốc jĭ teh đak jang hơdai gĭt kăl păng đunh đai; ‘meh vă kŭm hăm Hàn Quốc pơm ‘lơ̆ng hloh dơ̆ng tơdrong pơvei jang hơdai tôm tơdrong hăm tơdrong tơm păng ‘lơ̆ng gĭt kăl ‘noh jĭ jang hơdai găh mŭk drăm, mơdro sa păng tơmơ̆t jên jang.

Kơdră teh đak pơma hơdăh găh trong jang ‘nao đơ̆ng Việt Nam vă pơm tơdrong hiôk hloh, đei yua hloh hăm jên FDI lơ̆m Việt Nam. Kiơ̆ kơ ‘noh, Việt Nam tơplih đơ̆ng lăp hơdrô̆ “ sơng iŏk” jên FDI hơdrol âu, jing “jang hơdai” đunh đai hăm dôm anih tơmơ̆t jên jang teh đak đe kiơ̆ lơ̆m tơdrong hơtŏ băl, vang hơtŏk tơiung, vang đei yua, vang đei hơnăp jang hăm tơpôl, bơngai jang, vei lăng cham char.