Pơgê 22/12, tơ̆ Anih jang kơ ƀok Kơdră tơm lơ̆m plt Bogor, dêh char Pơmât Java, Kơdră tơm Joko Widodo pơgơ̆r lêh sơng Kơdră tĕh đak bơ̆n, ƀok Nguyễn Xuân Phúc. Đơ̆ng rŏng kơ lêh sơng đei pơgơ̆r tih, Kơdră tĕh đak Nguyễn Xuân Phúc pơma đam hăm Kơdră tơm Indonesia Joko Widodo.

Tơ̆ jơ pơma đam, Kơdră tĕh đak Nguyễn Xuân Phúc pơma hơdăh, Việt Nam pơkăp tơgŭm ăn Indonesia bơ̆ jang đang ‘lơ̆ng hơnăp jang pơm Kơdră ASEAN sơnăm 2023 păng Indonesia drơ̆ng nơ̆r tơgŭm ăn Việt Nam jang ‘lơ̆ng hơnăp jang lơ̆m Anih vei lăng tơdrong pơm tơm kơ kon bơngai LHQ jăl jang 2023 - 2025.

Ƀar ‘nu kơdră chĕp kơ̆l drơ̆ng nơ̆r hơmet pơ ‘lơ̆ng dôm tơdrong oei găn trong lơ̆m tơdrong tĕch mơdro vă gơ̆h iŏk đei jên tĕch mơdro đơ̆ng 2 pang truh 15 ti USD adrol kơ sơnăm 2028 kŭm nhen hơtŏk tơdrong jang hơdoi găh unh hơyuh rơgŏh, unh hơyuh rơgei păng pơm tơlĕch pil ăn gre ô tô điên. 2 ‘nu ƀok kơdră oei roi tơbăt tơdrong 2 tĕh đak pơtôch 12 sơnăm pơma đam chĕng song băl đak dơsĭ păng drơ̆ng nơ̆r hơnơ̆ng vei kơjăp trong jang đơ̆ng ASEAN găh tơdrong tơ̆ đak dơsĭ Biển Đông.