Hop akŏm đei tơdrong vang akŏm đơ̆ng hloh 850 ‘nu kơdră chĕp kơ̆l dôm anih jang mơdro sa tih hloh apŭng plĕnh teh păng tơring, păng tang măt kơ dôm anih jang apŭng plĕnh teh. Pơma tơ̆ jơ hop akŏm, Kơdră teh đak Nguyễn Xuân Phúc tơroi 1,2 long nol hăm mơdro sa păng tơmơ̆t jên jang đơ̆ng apŭng plĕnh teh, nhen mơdro sa tŏk jơ̆p plei teh sơnăm ‘nâu lăp iŏk đei 3,5% păng tơ jur kơtang oei pă 1% lơ̆m sơnăm truh; dôm tơdrong tơblăh blŭng, kơjă ŭnh hơyuh păng phe ƀa tơmam sa tŏk lơ, ưh kơ đei anih pơ truh, hơtŏk kơjă lơ.

Kơdră teh đak Nguyễn Xuân Phúc kŭm hlôi tơroi dôm tơdrong ‘lơ̆ng mơ̆t jang hơdai hăm Việt Nam, lơ̆m noh hlôi kĭ pơkăp păng pơm kiơ̆ vă jê̆ 60 tơdrong tơchơ̆t pơtrŭt, vei lăng tơgŭm tơmơ̆t jên jang păng pơm kiơ̆ 15 tơdrong tơchơ̆t mơdro sa hiôk hian (FTA), lơ̆m noh đei lơ FTA chăl hle.