Lơ̆m ‘măng năm hơpong tơ̆ tĕh đak Hàn Quốc, kơsơ̆ 4/12, đơ̆ng rŏng kơ truh tơ̆ anih tơm Seoul, Kơdră tĕh đak Nguyễn Xuân Phúc đei dôm ‘măng sơng tơƀâp 1,2 Khul jang tơbôl, jang hơdoi mŭk drăm, joh ayŏ kơ dŏ xoang, khul kon pơlei Hàn – Việt đei lơ tơdrong tơgop ‘lơ̆ng pơm hơtŏk tơdrong pơvei kơ 2 tĕh đak.

Sơng Khul jang tơbôl Hàn - Việt (KOVIFA), yoa ƀok Kim Joon, Kơdră khul chĕp kơ̆l, Kơdră tĕh đak Nguyễn Xuân Phúc pơma hơdăh, lơ̆m 30 sơnăm âu ki mă đơ̆ng ưh măh đunh mă lei tơdrong pơvei kơ 2 tĕh đak hlôi iŏk đei lơ tơdrong jơnei ‘lơ̆ng, jĭ tĕh đak jang hơdoi tơm hăm băl, jĭ tĕh đak jang hơdoi ‘lơ̆ng hơiă găh tơdrong pơvei lơ̆m apŭng plenh tĕh, tơdrong jang hơdoi lơ̆m rim tơdrong nhen tơmât jên jang, tĕch mơdro, chă tơmang lăng, bơ̆ jang.

Kơdră tĕh đak hơpơi ‘mĕh păng lui khul hơnơ̆ng năm hơdrol, tưk tơiung hơnăp jang tơm găh jang tơbôl; atŏk tơiung tơdrong pơvei jang hơdoi lơ tơdrong; pơlung dôm anih tĕch mơdro Hàn Quốc hơtŏk tơdrong tơmât jên jang, tĕch mơdro hăm Việt Nam; jang hơdoi hăm Tơpôl 20 rơbăn bơngai Việt Nam tơ̆ Hàn Quốc, mă loi jĭ unh hnam đei mŏ mai bơngai Việt Nam iŏk unh hnam hăm bơngai Hàn Quốc.