Tơ̆ jơ tơƀâp, 2 ‘nu kơdră chĕp kơ̆l drơ̆ng nơ̆r hơtŏk dôm tơdrong adrin vă hơnơ̆ng hơ nhăk tơdrong pơ vei 2 tĕh đak roi đunh roi ‘lơ̆ng păng đei yoa hlŏh dơ̆ng, lơ̆m nŏh năng kăl hơtŏk tơdrong pơ gơ̆r tơƀâp ăn kuan tih păng rim khul grŭp, tưk tơiung dôm tơdrong jang hơdoi đei yoa ‘lơ̆ng hrei ‘nâu nhen jang hơdoi tơ̆ đak dơ sĭ, choh jang xa – ka hơ dang, pơtho pơhrăm, bơ̆ jang... atŭm hăm ‘nŏh pơih xă tơdrong jang hơdoi găh tơdrong tang găn tŏ ‘mi kial tơ plih, jang mŭk drăm kơ sô̆, jang tŏk rơgŏh, tĕch mơdro hăm điên tư, pơm tơ lĕch unh hơ yuh rơgŏh.

Pơma nuh găh tơdrong tơ̆ tơring păng lơ̆m apŭng plenh tĕh tơ jê̆ âu, 2 ‘nu kơdră chĕp kơ̆l pơma hơdăh đon pơ hnŏng, hơnơ̆ng jang hơdoi kơjăp vă tưk tơiung tơdrong tơguăt 1 ƀơ̆r đon păng vei kơjăp hơnăp jang tơm đơ̆ng ASEAN lơ̆m dôm tơdrong vei sơđơ̆ng atŭm, đei hloi tơ̆ đak dơ sĭ Biển Đông, tơgop ăn dôm tơdrong adrin pơjing tơdrong rơngei hiôk hian, sơđơ̆ng ‘lơ̆ng păng jang tŏk tơ̆ tơring păng lơ̆m apŭng plenh tĕh.