VOV4.Bahnar  – Năr 10/10, tơ̆ Anih jang Khul Kơpal teh đak, ƀok Kơdră teh đak bơ̆n Nguyễn Xuân Phúc tơjrâ̆m pơma dơnuh hăm kơdră anih jang mŭk drăm Teh đak jang rơgei lơ̆m tơdrong jang tĕch pơdro păng pơ 'lơ̆ng Đảng.

Pơma tơ̆ jơ tơjrâ̆m, ƀok Kơdră Nguyễn Xuân Phúc ră hơdăh, anih jang mŭk drăm Teh đak ưh adrô̆ xek tơlang dôm pơkăp hơtŏk mŭk drăm – tơpôl mă oei jing “hla kơ” vei vêr đon kơchĕng păng trong jang chuh nghĩa xăh hô̆i. Ƀok Kơdră teh đak Nguyễn Xuân Phúc pơkăl Anih jang Đảng dôm anih jang mŭk drăm Trung ương lơ̆m khei năr truh kăl pơtoi băt hơdăh, pơm kiơ̆ tơnăp dôm Tơchơ̆t, pơgơ̆r jang đơ̆ng Đảng; hơtŏk pran tơdrong pơ 'lơ̆ng Đảng; keh đang jơnŭm jang đảng vei xơđơ̆ng pơdrơ̆ng hăm pơkăp, pơkăl pơm kiơ̆ xơnong pơkăp đơ̆ng anih jang mŭk drăm kiơ̆ pơkăp trŏ ƀlep. Găh minh ƀar tơdrong jang lơ̆m khei năr truh, Kơdră teh đak Nguyễn Xuân Phúc pơkăl, jơnŭm pơgơ̆r jang athei keh đang hơtŏk iŏk yua dôm pơkăp vei pơgơ̆r 'nao, pơtho bơngai jang trŏ nhen pơkăp păng kăl, hơmet dôm tơdrong tơchơ̆t jang, pơ 'lơ̆ng dôm tơdrong hơbĕch tơgar jang đơ̆ng dôm anih jang dơnơm.

VOV/ Lan tơblơ̆ nơ̆r