Kơdră teh đak bơ̆n Nguyễn Xuân Phúc pôk bơnê kơ Jơnŭm Nô̆i chĭn Trung ương hlôi hơmet chih akŏm tơbang tơdrong jang đei jơnei kơ xơnăm 2022 hăm lơ kơtơ̆ng ang, hla bar chih răk păng tơlĕch trong jang ăn xơnăm 2023 mă gơh jang hiôk; chih iŏk nơ̆r tơgop kăp gĭt đơ̆ng rim bơngai tang măt năm hop akŏm.

Drơ̆ng nơ̆r hăm tơdrong jang păng dôm xơnong jang tơm, xơnong jang hơdăh kơ Jơnŭm pơgơ̆r jang lơ̆m xơnăm 2023, Kơdră teh đak bơ̆n pơkăl, atŭm hăm xơnong jang hơnơ̆ng kiơ̆ anih jang, tơdrong jang đei axong, rim bơngai jang lơ̆m Jơnŭm pơgơ̆r tơrĕk pơgơ̆r dôm anih jang kơchăng pơkăp tơdrong jang vă pơm kiơ̆ dôm xơnong găh hơmet pơ-'lơ̆ng tư phap đei tơbang lơ̆m Tơchơ̆t 27 kơlih âu jing minh lơ̆m dôm tơdrong jang kăp gĭt kơ xơnăm mă blŭng tơlĕch jang kiơ̆ Tơchơ̆t.