Pơma tơ̆ jơ tơƀâp, pơma truh đon tơchĕng pơ jei băl ‘mêm tĕh đak đơ̆ng Ƀok Hô păng tơdrong juăt “’mêm đe nai nhen ‘mêm kơdih kâu”, jơhngâm đon băt ‘mêm băl, tơgŭm băl ‘nŏh jĭ tơdrong tôch ‘lơ̆ng đơ̆ng hơdrĕch hơdrung băl, Kơdră tĕh đak Nguyễn Xuân Phúc tơƀôh đon hơiă păng čhưu jơhngâm mưh đei băt truh tơdrong “hơ‘mon lơ̆m tơdrong arih xa hmă hrei ‘nâu” đơ̆ng dôm bơngai đei đon ‘lơ̆ng lơ̆m tơdrong jang “Tơdrong ‘lơ̆ng”.

Kơdră tĕh đak pơma hơdăh Đảng păng tĕh đak bơ̆n ling lang tơrĕk truh dôm bơngai đei kŏng, bơngai tơnuh, bơngai jo jăn, bơngai ưh pŭn ai lơ̆m tơpôl, vă ưh đei bơngai yơ đei hŭt hơchăng lê̆ tơ̆ rŏng. Kŭm hăm ‘nŏh, tơdrong vang tơgŭm đơ̆ng dôm bơngai đei đon ‘lơ̆ng, tơdrong tơgŭm đơ̆ng dôm bơngai lơ̆m tơdrong jang “Tơdrong ‘lơ̆ng” ‘nŏh tôch gĭt kăl, yoa đe sư jĭ dôm bơngai oei jê̆ hăm bơngai mơmat tat hlŏh, tơdrong tơgŭm kŭm ‘lơ̆ng hlŏh, hơnhăk ba đon lui, ‘mêm băl lơ̆m tơdrong arih xa, tơgop pơm hơtŏk kơjă kăp gĭt đơ̆ng arih xa ‘lơ̆ng, jơhngâm đon kon bơngai Việt Nam băt ‘mêm mơ nat, ƀĕnh tơdrong ‘mêm kơeng.