Tơ̆ lêh tơlĕch jang, Kơdră Trung ương Jơnŭm vei lăng ‘long pơ glang ƀrê Việt Nam Bùi Thị Hòa roi tơbăt, Anih tơm Chĭnh trĭ hlôi klăih song băl jang ăn ƀok Võ Văn Thưởng, Bơngai jang lơ̆m Anih tơm Chĭnh trĭ, Kơdră teh đak Pơm kơdră Jơnŭm vei lăng ‘long pơ glang ƀrê Việt Nam jăl jang 2022-2027. Kơdră teh đak tơbăt gô hơdrin tơgop ăn tơdrong hơtŏk tơiung kơ Jơnŭm păng tơdrong jang ‘mêm mơnat lơ̆m teh đak tơ̆ hơnăp kơnh.

Sơnăm ‘nâu, hơdrin krao hơvơn đei tŏ sĕt hloh 400 ti hlak jên vă tơgŭm 1 triệu ‘nu bơngai đei tơdrong arih sa mơmat tat, lơ̆m noh tơgŭm hơdrol kon pơlei jang ka dơnuh hin, mơmat tat păng hơioh dơnuh hin, jo jăn gô iŏk đei tơdrong tơgŭm pran kơtang đơ̆ng dôm bơngai đei jơhngơ̆m đon ‘mêm mơnat lơ̆m păng ‘ngoăih teh đak. Kơdră teh đak krao hơvơn dôm anih jang, khŭl jang, anih mơdro sa, dôm anih jang apŭng plĕnh teh, dôm bơngai đei jơhngơ̆m đon ‘mêm mơnat păng rim răih kon pơlei hơnơ̆ng jang hơdai, tơgŭm, yak hơdai hăm Jơnŭm vei lăng ‘long pơ glang ƀrê Việt Nam lơ̆m tơdrong tơgŭm roi ‘năr roi jơnei hloh ăn bơngai dơnuh hin, bơngai đei tơdrong arih sa mơmat tat.