Kơdră tĕh đak Võ Văn Thưởng lui ‘măng năm hơpong gô tơgop gĭt kăl, pơm hơtŏk tơdrong pơvei ‘lơ̆ng hơiă đơ̆ng sơ̆ păng jang hơdoi lơ tơdrong đơ̆ng Việt Nam păng Czech. Kơdră tĕh đak pơma hơdăh, tĕh đak păng kon pơlei Việt Nam ling lang năng kăl păng hơpơi ‘mĕh pơm hơtŏk tơdrong pơvei ‘lơ̆ng hơiă đơ̆ng sơ̆ kơ 2 tĕh đak, đei pơjing đunh kơ âu hlŏh 70 sơnăm lơ̆m rim tơdrong.

Ƀar păh drơ̆ng nơ̆r hơnơ̆ng jang hơdoi kơjăp, tơgŭm băl tơ̆ khul jang lơ pang, anih jang lơ̆m apŭng plenh tĕh, mă loi jĭ tơ̆ Liên hợp quốc, ASEM, lơ̆m trong jang hơdoi ASEAN – EU vă tơgop ăn tơdrong rơngei, jang hơdoi păng jang tŏk tơ̆ tơring păng lơ̆m apŭng plenh tĕh. Găh tơdrong sơđơ̆ng, lơ̆m nŏh đei Biển Đông, kơdră chĕp kơ̆l 2 păh pơma hơdăh, kăl đei trong sek tơlang rim tơdrong tơgar băl kiơ̆ trong rơngei, đei hloi tơdrong jang tơbôl păng jang kiơ̆ mă lăp hăm Luơ̆t apŭng plenh tĕh, mă loi jĭ tơdrong hơgăt đơ̆ng Liên hợp quốc găh Luơ̆t đak dơsĭ (UNCLOS) 1982.