Pơma tơ̆ jơ tơƀâp, Kơdră tĕh đak Võ Văn Thưởng tơƀôh đon hơ iă, hưch hanh păng hơnăp jang tih mưh đei Khul kơdră chĕp kơ̆l Trung ương, Tổng Bí thư Nguyễn Phú Trọng, dôm kơdră chĕp kơ̆l Đảng, tĕh đak lui pôk hơtŏk păng đei Kuô̆k hô̆i pơjao ăn hơnăp jang pơvih pơvăn ăn tĕh đak păng kon pơlei hăm kơchư̆k pơm Kơdră tĕh đak.

Kơdră tĕh đak pơma truh tơdrong gĭt kăl găh đon hlôh vao lơ̆m tơdrong jang atŏk tơ iung đơ̆ng hơdrĕch hơdrung, đơ̆ng tĕh đak, găh dôm tơdrong jang mă đĭ đăng Đảng, đĭ đăng kon pơlei păng đĭ đăng khul linh athei adrin bơ̆ jang tơ̆ hơnăp kơnh, kŭm nhen hơnăp jang tih tên tơ̆ hơnăp Đảng, tĕh đak păng kon pơlei mă Kơdră tĕh đak athei adrin, khŏm bơ̆ jang kiơ̆ tơdrong hơgăt đơ̆ng Khôi luơ̆t tơm. Tơƀôh đon hơ iă, ling lang chă răp mơ̆ng nơ̆r tơgop đơ̆ng bơngai ‘mêm kơ tĕh đak, Kơdră tĕh đak Võ Văn Thưởng hơpơi ‘mĕh iŏk đei lơ nơ̆r roi tơƀôh, nơ̆r athei lăp ‘lơ̆ng, tôch tơnăp đơ̆ng kăn ƀô̆, bơngai juăt jang tơ̆ Anih pơvih ăn Kơdră tĕh đak hăm tơdrong jang pơjing păng atŏk tơ iung tĕh đak.