Sơng iŏk nơ̆r krao hơvơn đơ̆ng Đại tướng, Kơdră tơm vei lăng khul linh teh đak Phan Văn Giang, Khul tang măt ăn khul linh teh đak Belarus yoa Trung tướng Viktor Gennadievich Khrenin, Kơdră tơm vei lăng khul linh teh đak Belarus chĕp kơ̆l năm ngôi tơ̆ teh đak Việt Nam păng truh hăm Tơdrong pơdă tơmam khul linh apŭng plenh teh 2024. Đơ̆ng rŏng kơ lêh sơng, 2 păh pơgơ̆r pơma đam. Tơ̆ jơ pơma đam 2 păh pơma nuh găh rim tơdrong lơ̆m apŭng plenh teh, tơ̆ tơring păng dôm tơdrong đei tơrek truh.

Găh tơdrong tơ̆ đak dơsĭ, Đại tướng Phan Văn Giang pơma hơdăh, đon tơchĕng ưh đei tơplih đơ̆ng Việt Nam ‘nŏh jĭ sek tơlang dôm tơdrong tơgar băl kiơ̆ trong rơngei, ‘moi kiơ̆ khôi luơ̆t apŭng plenh teh, lơ̆m noh đei tơdrong tơchơ̆t đơ̆ng Liên hợp quốc găh Luơ̆t Đak dơsi (UNCLOS) sơnăm 1982; jang kiơ̆ tôm tơdrong tơchơ̆t găh Pơma xa, bơ̆ jang ‘lơ̆ng hơiă đơ̆ng dôm pang tơ̆ đak dơsĭ Biển Đông (DOC) păng jăh hơmet kĕh, kĭ pơkăp tơdrong hơgăt pơma xa, bơ̆ jang ‘lơ̆ng hơiă đơ̆ng dôm pang tơ̆ đak dơsĭ Biển Đông (COC) mă đei yoa, lăp hăm khôi luơ̆t apŭng plenh teh.