Ƀar Ƀô̆ trương drơ̆ng nơ̆r akhan, khei năr ou ki, tơdrong jang hơdoi gah khul linh kơ 2 teh đak đei tơlĕch jang tôm tơdrong, tơnăp, kiơ̆ trŏ pơkăp mă kơdră kơpal kơ 2 teh đak hlôi pơdrơ̆ng. Ƀar pah pơtoi jang tơnăp gah tơdrong pơma đam, tơgŭm jang ăn kơdră kơpal; hơtŏk jang hơdoi đơ̆ng dôm khul linh vei lăng tơring sơlam teh, khul linh duk, khul linh dăr hơlen đak dơsĭ; jang atŭm chă dăr hơlen, tơjră hăm tơdrong pơm glăi găn lơ teh đak, tĕch pơdro tơtông, pơgơ̆m pơjĭp lơ̆m tĕch pơdro. Lơ trong jang hơdoi kăp gĭt đei tơlĕch jang nhen: tơguăt kơđông – anih jang hơlen, tơguăt tơring kon pơlei 2 pah sơlam teh, dôm tơdrong jang pơyua ăn tơpôl tơgŭm kon pơlei tơring sơlam teh.

Ƀar Ƀô̆ trương drơ̆ng nơ̆r pơtoi hơtŏk tơdrong tơguăt tơguăl, jang tơbôl; hơtŏk tơƀơ̆p, pơtruh khul kơpal pơma đam; pơtoi jang đei jơnei dôm pơkăp jang hơdoi 2 pah mă oei đei dang ei; pơih să hơpeh hơpong đe khul linh mơlôh, kơdră mơlôh; hơtŏk kơtang pơtho bơngai jang; jang hơdoi kơjăp, tơgŭm dih băl lơ̆m dôm pơkăp jang, hop akŏm gah khul linh lơ̆m tơring păng lơ̆m apŭng plenh teh. Ƀar pah adoi drơ̆ng nơ̆r hơtŏk jang hơdoi 3 teh đak Việt Nam – Lào – Campuchia, lơ̆m noh đei dôm tơdrong tơƀơ̆p rim sơnăm đơ̆ng 3 Ƀô̆ trương vei lăng Khul linh păng pơtơ̆p pơhrăm linh atŭm gah tơjră hăm dôm tơdrong tơnap tap gah vei sơđơ̆ng tơpôl, nhen tơgŭm dŏng sar bar, tang găn păng tơjră tŏ 'mi kial, pơrang jĭ pơrăm.