Dôm năr blŭng khei 4, tơ̆ hơnih ming man kơsô̆ 2 lơ̆m Tơdrong jang pơkăp 2 trong kơdou hrĕnh Khánh Hòa – Buôn Ma Thuột, tơdrong jang ming man adoi oei đei pơm jang hăt hot. Rim khul bơngai jang, đe kih sư atŭm hăm lơ kơmăi kơmŏk kơ Kŏng ti Kô phân Asong ming man trong nơnăm Phương Thành oei hăt hot tuh bê tông jrăng, pơm drơh gơng păng tuh như̆a ah ƀar pah kơ̆l gơng. 'Nhŏng Đỗ Đình Huấn, vơ̆r gre chôk teh man drơh tơmăn ăn tơbăt, lơ̆m khei năr kơjă đak xăng đak dou tŏk kăp, tơdrong yua kơmăi kơmŏk athei mă kơchăng, trŏ ƀlep hloh vă mong ƀiơ̆ jên huach păng vei sơđơ̆ng tơdrong pơkăp ming man: “ 'Nhŏng oh kơchăng mong ƀiơ̆ ah mă yua kơmăi kơmŏk, ah hơtŏk ga, tơ-'nhur tơmam ming man noh athei sơđơ̆ng, ưh đei ăn kơmăi kơdou deh. Ah kơdou noh athei vei sơđơ̆ng ga, vă tang găn huach lơ đak xăng đak dou hloh. Lơ 'măng gô gre kơdou, dah mă pơdơh rơhơi noh athei păt kơmăi vă mong ƀiơ̆ đak dou”

Kiơ̆ kơ ƀok Lương Công Lý, Kơdră Hơnih iŏk ming man kơsô̆ 2, kơjă đak dou tŏk kăp păng ưh đei lơ pơm ăn jên huach jang kơmăi kơmŏk kơ khul jang tŏk kăp, atŭm hăm noh tơdui hloi kơjă tơmam drăm ming man nhen mam, thep, xi măng, chuơh, tơmo tŏk truh 20%. Hăm tơdrong đei ƀôh ou, hơnih jang hlôi kơchăng gah jou diesel păng hơmet tơdrong ming man, vă akŏm mah đak dou păng trŏ khei năr pơkăp jang: “Đak dou păng tơmam ming man tŏk kăp păng khăi, nhôn kơchăng chă dôm tơdrong pơyua nai vă vei sơđơ̆ng ăn tơdrong ming man. Atŭm hăm noh, hơnih jang adoi chă hơlen, akŏm păng asong ming man ăn dôm tơdrong tơm nhen man tăl base (như̆a trong), CTB păng drơh tơ̆ dôm jăl trong dơnơm”

Tơdrong pơm jang hăt hot adoi ƀôh hơdah tơ̆ hơnih ming man kơsô̆ 3, oei lơ̆m Tơdrong jang pơkăp 2 jăl trong kơdou hrĕnh Khánh Hòa – Buôn Ma Thuột. Tơdrong ming man đei kơjă pơkăp pơhlom 1.000 tih hlj, đei 2 trong trôm, trong gơng păng pơhlom 2,5 km trong. Ƀok Trịnh Trung Lượng, Kơdră hơnih ming man kơsô̆ 3 ăn tơbăt, vă jê̆ 1 khei kơ ou, kơjă đak xăng đak dou tŏk kăp dêh hnang, păng khăi dơ̆ng noh pơm ăn hơnih jang mŭk drăm ƀơm lơ tơnap tap. Mă thoi noh, hơnih jang oei pơtoi akŏm pơhlom 250 bơngai jang, kih sư atŭm hăm 100 kơmăi kơmŏk, gre ou to vă vei sơđơ̆ng ăn tơdrong ming man.

Dang ei oei ah khei tơm kơ pơyan phang, tŏ 'mi kial sơđơ̆ng ăn tơdrong ming man noh rim năr hơnih jang kăl pơhlom 4.000 lit jou diesel vă kơdou kơmăi kơmŏk. Yuơ noh, kiơ̆ kơ ƀok Trịnh Trung Lượng, tơdrong vei sơđơ̆ng đak dou tŏk bŏk jing tơdrong mă hơnih jang athei akŏm sek tơlang: “Kơjă đak dou tŏk kăp dêh hnang păng khăi dơ̆ng pơm ăn kơ nhôn athei hơmet mă kơchăng. Nhôn hlôi kơchăng pơm jang hăm dôm hơnih asong vă chih măt hrôih, răt lơ vă mong. Dang ei nhôn oei đei 3 ƀôn mong đak tih đơ̆ng 15.000 truh 20.000 lit dou diezel păng 'măn yua ăn tơdrong ming man đơ̆ng 1 – 1 khei minh puơ̆t”

Pơtơm ming man đơ̆ng khei 6/2023 hăm jên asong jang đei jê̆ 22.000 tih hlj, trong kơdou hrĕnh Khánh Hòa – Buôn Ma Thuột đei lăng jing trong pơkăp jang tih vă pơtoi tơring Tây Nguyên păng tơring Pơbah Tŏk bŏk. Lơ̆m khei năr kơjă đak xăng đak dou tŏk kăp dêh hnang, rim hơnih asong ming man hlôi kơchăng chă lơ trong jang vă vei sơđơ̆ng ăn tơdrong pơm jang kiơ̆ tơdrong pơgơ̆r đơ̆ng Thủ tướng teh đak.