Đơ̆ng rŏng mĭnh sơnăm pơjing khul tơgoăt hơdai, dôm bơngai đe ư hơngang lơ̆m mạng tơpôl tơ̆ Gia Lai tŏk bŏk tơgop tơbăt tơdrong hơlĕnh pơdăr, tang găn tơdrong kơnê̆ jơnei hloh, tơgop pơjing hơnih kơsô̆ sơđơ̆ng, 'lơ̆ng rŏ. Iung pơma tơ̆ hop akŏm, Thượng tá Đỗ Minh Kim- Phŏ kơdră anih jang 3, Anih jang vei lăng sơđơ̆ng mạng păng tang găn tơdrong yoch iŏk yua kơmăy kơmŏk hơgei, Anih tơm vei lăng Kŏng an tơbăt, lơ̆m jăl jang kơnh, tơdrong vei lăng sơđơ̆ng tơlĕch ăn ưh khan lăp hơmet pơ 'lơ̆ng tơdrong kơtơ̆ng ang ya, kơtơ̆ng ang kơnê̆, mă lei kăl kơchăng vei lăng kon pơlei đơ̆ng hơnih kơsô̆ hloi.

Hơdai hăm ‘noh, Anih jang vei lăng sơđơ̆ng mạng păng tang găn tơdrong yoch iŏk yua kơmăy kơmŏk hơgei tŏk bŏk pơtrŭt Khul đon lui kơsô̆, pơjing trong jang vang yak hơdai đơ̆ng anih vei lăng teh đak, tơpôl KOL, anih mơdro sa kơmăy kơmŏk kơsô̆ păng rim khul jang tơpôl. Mưh tơdrong jang Kâu lak ƀô̆ âu bơ̆jang đei yua, gô pơjing đei “ hla găn kơsô̆” vei lăng tơpôl.