Tơmoi Việt hơpơi ‘moih păng tơrĕk tơnăp hloh hăm dôm tour tơmang pơhiơ̆ lơ̆m teh đak vă chă hơlen lăng groi kông, tơring kông, hăm lơ tơmam drăm tơmang pơhiơ̆ gơh rơgei păng lơ tơdrong, rơbeh rơbai vă hơlen băt. Minh ‘nu tơmoi ăn tơbăt: Ăh vih truh tơ̆ âu đei lơ tơdrong pơchơt nhen vơ̆r thŏng, trah jal rôp ka, tong pơnĭk đak ăn kơ brai, tanh brai, năm tơmang pơlei pơla păng hơlen băt găh tơdrong pai dôm tơmam xa tơ̆ tơring. Inh lŭ lăp tơpă.  

Tơmoi Việt tơrĕk chă tơmang lơ̆m teh đak kơlih đơ̆ng rŏng kơ pơrang jĭ Covid-19 hơbuh hli, tơdrong vih vơ̆t oei lơ pơngơ̆t, kơjă kăp, tơdrong hli đơ̆ng pơrang adoi tam mă xơđơ̆ng. Tơdrong mă noh tơblang kơlih kiơ lơ̆m xơnăm 2022, tơmang pơhiơ̆ lơ̆m teh đak jing xô̆ hơ-iă hloh. Kơyươ jên huach ưh gan lơ, tơmam drăm noh lơ, ưh gan hli hlơt kiơ hăm pơrang jĭ, hloh kơ noh tơmoi mơn ưh kơ hiôk đơ̆ng rŏng kơ khei năr pơkăp oei ataih băl, noh rơih năm tơmang lơ̆m teh đak jing trong tơlĕch tơnăp hloh. Tơdrong jang tơmang pơhiơ̆ Việt Nam tơlĕch tơchơ̆t lơ̆m xơnăm 2022 xơng 65 trĭu ‘nu tơmoi, đei 60 trĭu tơmoi lơ̆m teh đak păng 5 trĭu tơmoi đơ̆ng teh đak đe. Truh dang ei, tơmoi lơ̆m teh đak hlôi jơnei pơkăp hrôih hloh kơ tơlĕch tơchơ̆t, hăm hloh 101 trĭu ‘nu tơmoi, tŏk hloh 1,5 ‘măng pơtêng hăm tơlĕch tơchơ̆t. Ƀok Nguyễn Quý Phương – Kơdră Anih tơm ‘Nhăk tơmoi tơmang pơhiơ̆ – Anih tơm Tơmang pơhiơ̆ xơkơ̆t: Đei lơ anih jang găh tơmang pơhiơ̆ đang kơ noh anih jang hnam oei xa ăn tơmoi adoi akhan, hrat kơyươ jang hơnơ̆ng kơlih tơdrong kăl tŏk tenh đơ̆ng tơmoi truh oei. Kơyuơ noh vă xek tơlang tơdrong âu, ‘nguaih kơ tơdrong hơtŏk pơ-‘lơ̆ng bơngai jang, nhôn adoi xơkơ̆t, mă mônh noh pơdui pơyan tơm lơ tơmoi, mă 2 noh 1 xơnăm nhôn athei hơtŏk tŏ xĕt jat noh 2 pơyan tơmang pơhiơ̆ lơ̆m teh đak.

Mă tơdrong tơmang pơhiơ̆ lơ̆m teh đak đei lơ hơtŏk hơ-iă păng jing minh lơ̆m dôm teh đak mă blŭng lơ̆m tơring Đông Nam Á pơih ‘măng jang dơ̆ng đơ̆ng rŏng kơ pơrang Covid-19 hơbuh hli mă lei Việt Nam đei tơdrong hơmet pơ-‘lơ̆ng tơmang pơhiơ̆ kơđeh hloh pơtêng hăm dôm teh đak lơ̆m tơring. 18,1% jing kơsô̆ kơđeh kơđoch pơtêng hăm tơdrong hơmet pơ-‘lơ̆ng tơmang pơhiơ̆ đei 26 truh 31% kơ dôm teh đak tơjê̆ nhen Thái Lan, Singapore, păng Malaysia. Kơsô̆ tơmoi teh đak đe truh Việt Nam lơ̆m xơnăm âu đei truh 3,5 trĭu ‘nu, adrô̆ đei 70% pơtêng hăm tơlĕch tơchơ̆t. Minh ƀar teh đak juăt jue kơ Việt Nam nhen Trung Quốc oei tam mă pơih ‘măng, atŭm hăm dôm tơdrong kăp gĭt găh chĭnh trĭ, rơhiŭng rơhiăng găh mŭk drăm jing tơdrong đei ƀôh pơm ăn tơmoi đơ̆ng châu Âu ưh đei lơ. Mă lei, oei đei lơ tơdrong “tơhlăk tăk”, “tơnap tap”, pơgăn tơdrong xơng tơmoi đơ̆ng teh đak đe noh jing tơdrong tui đon tơ-‘ngla, pơm ăn đei tơdrong mă âu. Đei lơ tơmoi đơ̆ng teh đak đe truh Việt Nam mơmơnh akhan, pơkăp găh visa, hăm lơ hla bar pơxươ̆k pơxươ̆l, ưh đei hơdăh pơm ăn đe xư ƀơm lơ tơnap tap. Pơmai Sandra, 26 xơnăm, bơngai Thụy Sĩ tơroi: Inh ƀôh tơnap tap lơ̆m tơdrong tơchă trang web dơnơm kơ Jơnŭm pơgơ̆r teh đak vă tơmơ̆t apinh apply visa ƀônh hiôk hloh. Găh visa noh khei năr dăng oei tŏ xĕt jat, tơnap vă pơdui đunh khei năr inh dăng oei tơ̆ Việt Nam kơlih hla bar chă bơ̆ âu to tơnap tap  

Tơchơ̆t axong hla bar thĭ thư̆k kơ Việt Nam tơpă oei lơ tơdrong tơhlăk. Tơdrong mă âu pơm tơhlăk tăk hăm tơmoi đơ̆ng teh đak đe. Yă Đào Thị Nga – Kơdră anih jang Khăch sạn Little Charm Hanoi Hostel ăn tơbăt:  Tơdrong mă blŭng, noh nơ̆r apinh atŭm đơ̆ng kơ rơbâu 'nu tơmoi truh hăm Việt Nam đơ̆ng rŏng kơ Covid ƀơm lơ tơxŭl tơxăl lơ̆m tơdrong mă đe xư 'meh pơdui khei năr visa vă gơh oei đunh hloh hăm visa mă đe xư đei axong noh 15 năr noh dang ei, tơchơ̆t đơ̆ng teh đak axong visa noh 15 năr. Mưh tơmoi 'meh oei đunh hloh athei lĕch đơ̆ng Việt Nam, hao gre păr truh minh teh đak nai păng vih hơlơ̆k dơ̆ng. Thoi noh ưh kơ hiôk ăn tơmoi, pơm ăn đe xư athei huach lơ jên hao gre păr, khei năr đe pơdơh pơdei, tơmang pơhiơ̆ ƀơm tơhlăk noh đe ưh hơ iă ôh.

Dang ei, Thái Lan pă đei yua visa tơmang pơhiơ̆ ăn 65 teh đak, hăm khei năr dăng oei noh đơ̆ng 30 truh 45 năr, phŏ tŏk truh 90 năr păng gơh mơ̆t lĕch lơ 'măng. Lơ̆m kơplăh noh, truh khei năr âu, Việt Nam adrô̆ ưh yua visa ăn 24 teh đak, hăm khei năr dăng oei noh 15 năr păng mơ̆t lĕch minh 'măng đĕch. Mă lei, kiơ̆ dôm bơngai juăt jang găh tơmang pơhiơ̆, 'meh pơklaih tơnap tap ăn tơmang pơhiơ̆ noh hơmet pơ-'lơ̆ng thĭ thư̆k tam mă tôm ôh. Athei hơlen lăng tôm tơdrong, đei hloi tơdrong tơroi tơbang, chơ 'nhăk tơmang lăng, dăng oei, adoi nhen bơngai pơm jang. Vă pơklaih dôm tơdrong pơgăn oei đei lơ̆m tơdrong pơih 'măng xơng tơmoi đơ̆ng teh đak đe, ƀok Nguyễn Công Hoan – Kơdră Anih jang Tơroi tơbăt păng tơplih kơsô̆ - Jơnŭm jang tơmang pơhiơ̆ Việt Nam pơtruh nơ̆r hăm minh ƀar trong jang: Dang ei, mă blŭng bơ̆n athei hơtŏk tơring jang, ưh đei akŏm lơ̆m tơring juăt jue dơ̆ng mă athei pơih xă truh dôm tơring 'nao, jing dôm tơring đei mŭk drăm xơđơ̆ng, dang ei tơmoi kĕ kla jên lơ hloh. Mă 2 noh dôm tơdrong ƀônh hiôk găh trong gre păr truh Việt Nam. Tơdrong kăl mă 2 noh găh visa. Kơlih mưh xơkơ̆t đei tơring tơmang mă lei ưh đei dôm trong jang tơnăp vă pơjing tơring tơmang pơhiơ̆, hơvơn tơmoi truh hăm Việt Nam noh duh adrô̆ jing mŭk drăm lê̆ hoh đĕch.  

Lơ̆m xơnăm 2023, Việt Nam tơchơ̆t xơng 10 trĭu 'nu tơmoi đơ̆ng teh đak đe. Vă đei jơnei tơchơ̆t âu, bơ̆n dar deh xut lê̆ dôm “tơdrong tơhlăk” pơgăn tơdrong jang xơng tơmoi. Atŭm hăm noh, kăl đei tơdrong jang hơdăh đơ̆ng pơjing tơmam drăm, xơng tơmoi truh dôm trong pơkăp lơ trong jang, mă kăl noh pơklaih tơhlăk tơhlĭn tih hloh noh visa. Tơdrong hơmet dôm tơdrong tơnap tap, iŏk yua dôm trong hiôk păng hơtŏk tơ-iung, atŭm hăm noh tơmang pơhiơ̆ apŭng plenh teh păng tơmang pơhiơ̆ lơ̆m teh đak gôt ơgop pơjing jơhngơ̆m pran ăn tơdrong hơtŏk tơ-iung, hơtŏk tơdrong tơgar kơ tơdrong jang tơmang pơhiơ̆ Việt Nam.