VOV4.Bahnar - Dôm năr âu ki, jơ hngâm đon hưch hanh, hơ iă kơ năr Quốc Khánh 2/9 đei tơ̆ jơ̆p pơ lei pơ la Tây Nguyên. Tơ̆ plei Phôk, xăh Ea Rbin, apŭng Lăk, 1 pơ lei hơ tăih yăih kơ dêh char Dak Lak, hla kơ ƀrê, sơ ‘nglŏng dreng păr mơ liơk tơ̆ jơ̆p trong pơ lei. Ƀok Y-Ƀlor Lưk- ƀok pơ gơ̆r plei Phôk, xăh Ea Rbin ăn tơ băt, tơ drong hưch hanh kơ năr Quốc khánh vă tơ tă ăn kon pơ lei ƀlŏk truh tơ drong juăt tơ guăt 1 ƀơ̆r đon, kiơ̆ trong jang đơ̆ng Đảng, tĕh đak vă pơ jing pơ lei pơ la roi đunh roi pơ drŏng ‘lơ̆ng rŏ:

“Mă mônh nhôn hơ nơ̆ng roi tơ băt, athei kon pơ lei hơ tol hla kơ vă băt truh ‘năr 2-9 năr Quốc Khánh, tôch chơt hơ iă. Kŭm nhen rim sơ năm, rim hnam hơ tol hla kơ ngăl. Nhôn roi tơ băt ăn mih ma duch nă băt truh tơ drong gĭt kăl đơ̆ng năr Quốc Khánh ‘nŏh jĭ năr Têt rơ ngei kơ hơ drĕch hơ drung. Ƀlŏk hơ dơ̆r kơ Ƀok Hô păng dôm bơ ngai hlôi lôch tang ăn tĕh đak, dôm bơ ngai đei kŏng hăm kăch mang, kon pơ lei kiơ̆ đơ̆ng Đảng, tĕh đak. Mih ma duch nă băt mât 1 ƀơ̆r đon, mưh krao hơ vơn vang tơ gŭm ăn anih mong jên yoa bơ ngai tơ nuh, tơ gŭm mưh hiong răm yoa đơ̆ng ‘mi kial hơ bŭt dăh mă tơ gŭm ăn bơ ngai răm đơ̆ng pơ gang dioxin ‘nŏh kon pơ lei jang kiơ̆ ngăl.”

Ƀok Đinh Đăm (bơ ngai BaNa), kră pơ lei plei Kon Sơ Nglok, xăh Hà Đông, apŭng Đak Đoa, dêh char Gia Lai. Năm pơm ƀô̆ đô̆i đơ̆ng sơ năm 1963, ƀok Đinh Đăm lăng ƀôh tơ drong tơ blăh vang tơ̆ Tây Nguyên tôch kơ krưp krĕnh, lơ bôl buăl lôch hơ chăng vă vei lăng tơ drong rơ ngei hiôk hian. Yua thoi noh, ƀok Đinh Đăm ling lang tơ ƀôh jơ hngơ̆m đon băt bơ nê hăm ƀok Hồ hlôi chĕp kơ̆l kon pơ lei iŏk rơ ngei hơ drĕch hơ drŭng, hiôk hian, hơ nŭk hơ noa nhen năr ‘nâu:

“Ƀok Hồ jĭ bơ ngai hlôi pơ jing đei teh đak Việt Nam Dân chủ Cộng hòa, hơ nhăk ăn tơ drong hiôk hian ăn kon pơ lei. Gơ nang đơ̆ng đei rơ ngei, kiơ̆ nơ̆r ƀok Hồ pơ tho, kon pơ lei chhôk hơ iă, 1 jơ hngơ̆m đon, hơ drin jang sa, pơ tho, hŏk pơ hrăm băl găh trong vei rong kon tơ rong, pơ tăm ‘long hơ nhăk ăn iŏk yua lơ. Hơ drol sơ̆ ưh kơ đei gre hon đa, dang ei vă đĭ dôm ŭnh hnam tă kơ đei gre hon đa, đang kơ ‘noh gre kơ măy choh pơ yua ăn choh jang sa. Hơ drô̆ xăh Hà Đông hrei ‘nâu đei jĭt dôm tŏ bơih. Đang kơ ‘noh tivi, hơ tuh tơ ngiĕt đei ngăl, tơ drong arih sa tơ plih tôch kơ lơ”.

Tơ̆ tơ ring sơ lam Tuy Đức, dêh char Dak Nông, dôm năr âu ƀrŭng ƀrăng hla kơ tĕh đak, tơ băt Năr Quốc khánh 2/9. Ƀok Y Thái, Phŏ Bí thư Đảng apŭng Tuy Đức, ăn tơ băt, tơ ring đei lơ tơ drong juăt jang kăch mang, jĭ pơ lei bơ ngai tơ blăh kơ tang nuih mơng N’trang Lơng – bơ ngai chĕp kơ̆l pơ gơ̆r iung tơ blăh hơ yăt Phalăng tŏk tơ̆ Tây Nguyên lơ̆m dôm sơ năm ƀât blŭng a nglŏ 19; đei tơ ring kăn kư̆ kăch mang Quảng Trực – 1 anih ƀrê lơ̆m tơ drong tơ blăh Mi, iŏk rơ ngei ăn tĕh đak. Chĕp vei kơ jăp tơ drong juăt jang kăch mang, dôm sơ năm âu ki, kon pơ lei dôm hơ drĕch hơ drung tơ̆ Tuy Đức hơ nơ̆ng mât 1 ƀơ̆r đon, tơ gŭm băl jang atŏk tơ iung mŭk drăm.

Ƀok Y Thái, ăn tơ băt: “Kiơ̆ đơ̆ng dôm tơ drong hlôi jang đei, apŭng tơ lĕch tơ drong tơ chơ̆t găh tơ drong jang tơ jur tơ nuh hin kơ jăp ‘lơ̆ng tơ̆ dôm pơ lei pơ la kon kông, lơ̆m noh pơ ‘nhŏ ăn dôm tơ drong jang tơ gŭm ăn apŭng tơ nuh, tơ drong jang pơm hơ tŏk tơ drong arih xa găh tơ mam drăm, jơ hngâm đon ăn kon pơ lei kon kông păng tơ drong jang pơ jing tơ ring tơ rang ‘nao vă tơ mât jên jang ăn kon pơ lei. Dôm xăh tơ lĕch tơ drong jang tôch rơ đăh, lăp hăm rim pơ lei pơ la, tơ mât hơ dai jên mong đei vă bơ̆ jang. Anih jang đảng apŭng pơ jao tơ drong jang, hơ năp jang tôch rơ đăh ăn rim bơ ngai lơ̆m Khul kơ dră pơ gơ̆r, athei hơ len năng, pơ gơ̆r jang mă ‘lơ̆ng tơ̆ tơ ring, athei jang mă tơ pă, đei yoa tơ pă, khŏm jang đei tơ drong tơ jur tơ nuh hin ăn dôm pơ lei pơ la”.

Dơ̆ng hăm Thuem: Tơ blơ̆