Đơ̆ng rŏng dôm năr pơdơ̆h xa têt tôch hơiă, ƀok Nguyễn Viết Đồng tơ̆ phường Ea Kao, dêh char Đắk Lắk chă lĕch ngôi tơ̆ pơgar cheh phe lăng năng teh hăm iôm 'lơ̆ng ưh kiơ̆ đơ̆ng đing pruih đak kơtoh, kơchăng tơruih mah mai đak ăn ‘long pơtăm.

Ƀok Đồng ăn tơbăt, pơgar 'long unh hnam oei vă kơtĕn plei, pruih mah mai đak gô tơgŭm ăn 'long rong plei 'lơ̆ng ƀiơ̆, gô đei iŏk yoa lơ ƀiơ̆ lơ̆m pơyan phĕ truh: “Vă gơ̆h đei plei ‘yăl, hơkâu ‘lơ̆ng, dôm hơyak jang blŭng a tôch gĭt kăl, pruih đak trŏ jơnăr vă pơkao lĕch, kơtĕn plei ‘lơ̆ng. Nhôn tơgĕch xa têt đang, ‘nŏh năm jang tơ̆ pơgar hloi vă pruih đak ăn cheh phe. Hơpơi ‘mĕh pơyan Puih mak Bính Ngọ chơt hiôk, pơyan cheh phe sơnăm ‘nâu roi đei hlŏh dơ̆ng.”

Đơ̆ng rŏng kơ Tết ngôi hơdai, ƀok Nguyễn Văn Trường (xăh Cư Pơng, dêh char Đắk Lắk) oei năm jang hơlơ̆k dơ̆ng tơ̆ pơgar cheh phe xă 1,5 ha kơ unh hnam vă pruih đak ‘măng mă 2, khei ‘năr tôch gĭt kăl tơgŭm ăn plei kơten gĕi păng tih ‘lơ̆ng. Vă đei măh mai đak tơruih, ƀok Trường tơlĕch jên sir sơlŭng mong đak hăm ƀao kak kŭm hăm kơmăy, đing pruih đak ‘mơ ‘met: “Hrei ‘nâu, lơ̆m xăh vă rim hnam kôch teh, răt ƀao kak lơ̆k pơm sơlŭng mong đak. Pơm sơlŭng mong đak hăm ƀao kak tôch đei yoa. Kon pơlei mưh ƀôh ƀât yơ đei đak ‘nŏh ƀôm hơtŏk mong lơ̆m dơnâu. Gô truh hơtuch pơyan đei tŏ phang pơđang ‘nŏh iŏk đak âu vă tơruih ăn ‘long pơtăm.”

Đắk Lắk dang ei đei dang 213.000 ha cheh phe, akŏm lơ tơ̆ dôm tơring găh Pơmât (găh dêh char Đắk Lắk so). Gơnơm đei trong mong mah mai đak, jang kiơ̆ khoa hŏk ki thuơ̆t păng vei rong ‘lơ̆ng, plei cheh phe pơyan phĕ 2025 – 2026 đei plei tôch lơ, akŏm đĭ đăng hlŏh 570 rơbâu tân, hơnhăk iŏk yoa lơ ăn bơngai pơtăm.

Ƀât mă kon pơlei tơ̆ tơring găh Pơmât năm jang vei rong ‘long cheh phe ‘nŏh kon pơlei jang ka tơ̆ tơring găh Hơlĕch dêh char Đắk Lắk lĕch tơ̆ đak dơsĭ năm rôp yâu ka ƀât blŭng sơnăm đơ̆ng rŏng dôm năr xa Têt chơt hơiă. Tơ̆ tơnŏk ka Đông Tác, phường Phú Yên, (dêh char Đắk Lắk), lơ ƀato yâu ka ngư đak dơsĭ mât dơ̆ng chơ ba lơ ka.

‘Nhŏng Hồ Ngọc Hội – 1 ‘nu bơngai jang ka tơroi: “’Năr 5 Têt ‘nhŏng oh jang xa vih mât lơ̆m tơnŏk. Hơiă dêh, rôp yâu đei ka ngư lơ. Têt klui sơnăm 2026 âu nhen thoi đei jên lơ ƀiơ̆ đơ̆ng đak dơsĭ.”

Kŭm mât dơ̆ng tơ̆ tơnŏk ka Đông Tác đơ̆ng rŏng dôm năr xa têt, 'nhŏng Hồ Trọng Hạnh, tơ 'ngla ƀato jang ka tơ̆ phường Phú Yên, dêh char Đắk Lắk, chơt hơiă ăn tơbăt: “’Măng năm jang tơ̆ đak dơsĭ âu rôp yâu đei lơ mơ̆n, ‘nhŏng oh bu bu kŭm tôch hơiă. Ƀât blŭng sơnăm năm jang tơ̆ đak dơsĭ hiôk hian thoi âu hơiă dêh.”

Ƀât mă kon pơlei jang ka oei hao ƀato jang ka mât dơ̆ng tơ̆ tơnŏk ‘nŏh lơ bơngai pơdro kŭm truh răt ka hơdang tôch lơ lăp đơ̆ng rŏng kơ ƀato mât dơ̆ng. Ƀok Cao Thành Hưng, tang măt ăn anih tĕch mơdro juăt răt ka ngư tĕch tơ̆ teh đak đe ăn tơbăt, ka rôp yâu tơ̆ đak dơsĭ Trường Sa pơyan ‘nâu tih păng ‘lơ̆ng ƀiơ̆, đei lơ anih răt tơmam tôch hơlen nhen châu Âu, Mi, Nhật Bản lăp đon. Đĭ đăng ka chơ truh tơ̆ tơnŏk lơ̆m dôm năr blŭng pơyan Puih mak đei anih tĕch mơdro răt iŏk đĭ hloi: “Ƀât blŭng sơnăm nhôn adrin răt hăm yă ‘lơ̆ng ƀiơ̆, tơgŭm ăn kon pơlei đơ̆ng rŏng dôm năr yâu ka tơ̆ đak dơsĭ, vă bu bu kŭm đei 1 pơyan Têt klui phĭ tơtŏ dơnŏ ‘lơ̆ng.”

Kiơ̆ kơsô̆ chih jô̆ đơ̆ng Anih vei lăng ka hơdang păng achon kông tơ̆ đak dơsĭ kơ dêh char Đắk Lắk, đơ̆ng rŏng kơ Tết nguyên đán Bính Ngọ, rim năr đei truh dôm jĭt tŏ ƀato yâu ka (mă lơ ‘nŏh yâu ka ngư đak dơsĭ) mât dơ̆ng tơ̆ tơnŏk, hăm kơsô̆ ka rôp yâu đei truh kơhrĕng tân.

Đơ̆ng dôm pơgar cheh phe jing 'lơ̆ng truh dôm ƀato ƀĕng ka mât dơ̆ng tơ̆ tơnŏk ƀât blŭng pơyan puih mak, um rup jang xa đơ̆ng rŏng kơ Tết tơ̆ Đắk Lắk oei tơƀôh lơ tơdrong hơiă. Jơhngâm hưch hanh năm jang ƀât blŭng sơnăm, đon kơchăng jang xa păng pơvei kơjăp hăm băl đơ̆ng kon pơlei hăm anih tĕch mơdro hlôi pơjing đei đon lui ăn 1 sơnăm 'nao đei lơ tơdrong hơmĕng. Hăm đon lui 'nao, đon pơhnŏng plơ̆ng păng trong jang roi đunh roi đei yoa, kon pơlei jang chŭn mir, jang xa tơ̆ Đắk Lắk hơmĕng kơ sơnăm Bính Ngọ jang xa đei iŏk yoa lơ, tơdrong arih xa roi đunh roi tŏk 'lơ̆ng, vang tơgop ăn tơdrong jang tŏk pran kơjăp tơ̆ tơring.