Pơtăl kơ tơrĕk hăm tơplih kơmăi kơsô̆ gah kơmăi kơmŏk 'nao, tơdrong hop akŏm pơkăp tơpăt hăm tơdrong choh jang xa, tĕch răt rim năr kơ kon pơlei nhen chơ chă păng hơlen lăng kơtơ̆ng ang, iŏk yua AI, livestream, tĕch tơmam drăm trư̆k tuyê̆n, tơnăp hăm bơngai tĕch răt păng tơroh tơring tĕch răt; pơma đam gah trong kon pơlei jang mir tơrĕk hăm tơplih kơmăi kơsô̆ đơ̆ng tơdrong kăl rim năr.

Yă H’Giang Niê, Kơdră Jơnŭm kon pơlei jang mir dêh char Đăk Lăk akhan, Đăk Lăk đei lơ mŭk drăm, tơdrong hiôk gah choh jang xa, hăm lơ tơmam choh pơtăm kăp gĭt. Mă lei, pơm tơlĕch đei tơmam drăm 'lơ̆ng pơtơm jĭ mă blŭng đĕch. Bơngai pơm jang athei tơrĕk truh um ai, 'nŭng tah, tơm a la chă, pơjing hơnăn tơmam drăm, tơbang tơroi lơ̆m mạng tơpôl vă hơtŏk tơdrong kăp gĭt, tĕch răt tơmam drăm. 'Nou jĭ tơdrong gĭt kăl lơ̆m khei năr dang ei: "Vă tơgŭm ăn kon pơlei tơpă vei kơjăp hăm tơring tĕch răt, mă blŭng hloh noh nhôn pơih dôm lăm hŏk, tơgŭm ăn kon pơlei hlôh vao kơjăp gah tơdrong kăl. Atŭm hăm noh, Jơnŭm jang pơtho ăn kon pơlei jang atŭm hăm dôm KOC, KOL vă hơnhăk tơmam choh pơtăm tĕch tơlĕch kiơ̆ điê̆n tưh. Đơ̆ng rŏng kơ tơdrong jang ou, nhôn gô pơjing khul jang tơgŭm tĕch răt tơmam drăm, kơtă pơtho ăn kon pơlei băt chă livestream tĕch tơmam drăm adoi nhen băt chă tơrĕk hăm dôm tơdrong jang tĕch răt hăm kơmăi kơsô̆ nai. Tơdrong jang mă nhôn hơpơi 'meh tih hloh noh: Kon pơlei jang mir tơ̆ yơ, Jơnŭm jang gah kon pơlei jang mir tơ̆ noh; Jơnŭm jang hơnơ̆ng jing hơnih gơnơm kơjăp hloh yak hơdoi hăm kon pơlei lơ̆m trong jang tơplih kơmăi kơsô̆"

Tơ̆ 'măng pơma đam, rim bơngai tang măt adoi tơroi gah tơdrong pơjing đon lui hăm bơngai răt yua. Dôm tơdrong tơm đei pơma đam noh hơdah gah tơm a la chă, kơsô̆ pơkăp tơmam drăm, QR, tơroi gah trong pơtăm, tơroi tơbăt tơpăt păng tơguăt hăm bơngai răt yua đơ̆ng rŏng kơ tĕch tơmam. Đơ̆ng tơdrong noh lơ sơnăm tĕch tơmam trư̆k tuyê̆n đei yua, yă Trần Thị Bích, bơngai jang mir tơ̆ xah Ea Súp akhan, mưh hơmet tôm kơtơ̆ng ang gah tơmam drăm, rơih iŏk minh kênh trŏ ƀlep, chih akŏm tơdrong kăl păng pơma dơnuh rơhau hơ-iă, hơnơ̆ng hăm bơngai lăng, tơdrong jang tĕch răt tơmam drăm lơ̆m kơmăi kơsô̆ pơtơm gơh tơlĕch jang đei jơnei: "Tơdrong tơm tơchơ̆t truh tơdrong tĕch răt tơmam drăm gơh đei yua noh athei tơpăt, tơroi gah tơmam drăm athei mă trŏ, atŭm hăm tơdrong tơguăt hăm bơngai răt mă tơnăp. Mưh hơdrô̆ livestream pơma hoh đĕch noh tơnap kơ pơm ăn bơngai răt lui ngeh, kơlih ba ưh kơsĭ đe KOL dah mă KOC mă đe ư ang lang să ôh. Kơyuơ noh, tơdrong kăp gĭt tơpă kơ tơmam drăm jing tơkhuă pơm ăn tơdrong tĕch răt đei yua hloh"

Lơ̆m tơdrong pơma đam, Jơnŭm pơgơ̆r tơbang grŭp Zalo “Kon pơlei jang mir Đăk Lăk tĕch tơmam drăm online”, pơjing đei tơdrong tơroh đơ̆ng bơngai jang mir, hơp tak xah păng dôm bơngai đei tơmam drăm kăl tơbang, tĕch răt lơ̆m kơmăi kơsô̆.