'Mi tih đunh năr tơ̆ lơ tơring gah Hơlĕch dêh char Đăk Lăk pơm kơhrĕng ha ƀa, ƀum ƀlang tơ̆ xah Hòa Thịnh ƀơm đak lơ̆p. Kiơ̆ kơ tơring, pơhlom 300 ha ƀum ƀlang păng hloh 600 ha ƀa ƀơm răm. Xah hlôi hơvơn 15 đoan viên hơdruh tơdăm atŭm hăm 50 kang ƀô̆, linh kŏng ang năm tơ̆ mir na tơgŭm kon pơlei iŏk yua tơmam pơtăm.

Trung đoàn 888, Hơnih tơm Vei lăng Khul linh dêh char Đăk Lăk, pơtruh 70 kang ƀô̆ linh năm truh xah Hòa Thịnh tơgŭm kăt yuă ƀa, rô̆ ƀum ƀlang, vă tang găn răm kơyưo đơ̆ng 'mi kial đak hơbông. Atŭm hăm tơgŭm ăn kon pơlei, xah Hòa Thịnh tŏk bŏk oei chih akŏm trong jang vă tơjră kiơ̆ kơ 'mi kial tơhlu, kơchăng khul jang, tơmam drăm, vă vei sơđơ̆ng ăn kon pơlei păng tơjur ƀiơ̆ răm kơyuơ đơ̆ng 'mi kial đak hơbông.

Đơ̆ng rŏng 2 giĕng ‘mi tơ̆ lơ tơring, đak lip hơbông păng teh tơdrŭt hơlih tơ̆ lơ tơring kơ dêh char Lâm Đồng tôch kơtang. Kơsơ̆ năr 23/9, Hơnih vei lăng kon pơlei dêh char athei rim tơring dăr lăng, yông kon pơlei lĕch veh đơ̆ng bro hơmơt đei đak jroh lip, teh tơdrŭt hơlih; adoi iung năm tơ̆ rim tơring ưh kơ gơh lĕch tơ̆ ‘ngoăih, sơđơ̆ng tơmam sa, tơmam drăm kăl, ưh kơ lê̆ kon pơlei pơngot rơvĕt.

Pơđăm tơring đei ƀơm kơnê̆ kơtang hloh đei Cát Tiên 2, Cát Tiên 3, Quảng Khê, Đam Rông 2 păng Quảng Sơn đei athei ăn lơ khul jang, gre kmăi kmŏk năm truh tơgŭm djru kon pơlei. ‘Mi kial hơbŭt hơbông hlôi pơm ăn dang 60 pơbŭng hnam ƀơm kơnê̆, hloh 1.000ha ‘long pơtăm đak lơ̆p; hơdrô̆ tơring Hàm Kiệm đei dang 400ha ‘long plei guga đak lơ̆p kơtang. Trong hông hang krang nak Gia Bắc tŏ Trong glung 28 hơnơ̆ng đei teh tơdrŭt hơlih, pơm tơhlăk tơhlĭn trong nơnăm. Tim mă ƀôh tơdrong hiong răm kon bơngai.