Plei R’Chai 3, xăh Phú Hội, apŭng Đức Trọng, dêh char Lâm Đồng đei 305 ŭnh hnam, ‘noh đei 5 hơdrĕch hơdrŭng ‘nhŏng oh Yuăn, K’Ho, Khmer, Tày, Nùng vang arih sa, lơ̆m noh bơngai K’Ho đei lơ hloh. Lơ̆m tơring đei 4 tơdrong lui ‘noh jĭ: Lui Tin lành, Lui Phât, Cao Đài păng Kŏng Yăo.

Kon pơlei kơ dôm hơdrĕch hơdrŭng lơ̆m pơlei hơdrin, 1 jơhngơ̆m đon tơgŭm băl lơ̆m tơdrong arih sa. Đơ̆ng rŏng kơ jĭ Covid-19 đei vei lăng, kon pơlei kơ dôm hơdrĕch hơdrŭng, dôm khŭl lui tơ̆ âu hlôi hơdrin hơtŏk jang sa, tơgop pơjing tơring roi ‘năr roi hơtŏk tơiung tôm tơdrong. Sơnăm 2022, iŏk yua jô̆ phăl lăp kơ̆l bơngai đei 58triệu hlak jên. Pơđĭ pơlei lăp oei pă 2 ŭnh hnam dơnuh hin. Ƀok Ka Să Ha Nhiếu, bơngai jang Anih jang Mặt trận Tổ quốc Việt Nam dêh char Lâm Đồng, jĭ bơngai đei đe lui yom tơ̆ plei R’Chai 3, xăh Phú Hội, apŭng Đức Trọng tơroi:

"Ĭnh tôch kơ chơt hơiă yua kơ năr ‘nâu kon pơlei lơ̆m pơlei đĭ băt hŏk pơhrăm đơ̆ng ‘nhŏng oh bơngai yuăn, băt tơplih đon tơchĕng jang sa, tơplih trong choh jang sa. Kon pơlei tơring ‘nâu đĭ băt pơtăm dôm kơloăi ‘long đei kơjă mŭk drăm lơ, nhen: Hơmrĕ, lagim, pro kreng, ‘nhot, su su, cheh phe... Lơ̆m plei ‘nâu đei dang đơ̆ng 30 truh 40% ŭnh hnam kon pơlei pơtăm laghim, ĭnh ƀôh đei tơdrong tơplih rơđăh lơ̆m choh pơtăm.”

Dà Sar jĭ xăh hơtăih hơtŏ kơ apŭng Lạc Dương, dêh char Lâm Đồng, jĭ 1 lơ̆m dôm xăh kon kông hrôih jang đang đei tơring tơrang ‘nao. Lơ̆m xăh đei 7.832 ŭnh hnam kon pơlei, hăm hloh 31.200 ‘nu bơngai; lơ̆m noh kon pơlei kon kông đei vă jê̆ 70% kơsô̆ kon pơlei. Lơ̆m dôm sơnăm âu ki, gơnang đơ̆ng pơ̆n tơplih đơ̆ng cheh phe kră krut jing pơtăm mơmur - rong hơdrông pơm brai păng pơtăm dôm kơloăi pơkao, ‘nhot - ƀum- plei ‘long, kon pơlei hlôi đei iŏk yua lơ ƀiơ̆. Ƀok Cil Ha Ổn (bơngai K’Ho) oei tơ̆ thôn 3, xăh Dà Sar, apŭng Lạc Dương, dêh char Lâm Đồng tơbăt: găh lơ kon pơlei tơ̆ âu kiơ̆ lui Tin Lành, păng đei khŭl kơdră tơring pơm tơdrong hiôk ăn ming man 2 tŏ hnam hơkŭm tih ‘lơ̆ng. Gơnang đơ̆ng mŭk drăm hơtŏk tơiung, kon pơlei kon kông kiơ̆ lui Tin lành tơring ‘nâu hlôi đei tơdrong hiôk vă sơng Nôel hiôk hian:

“Sơnăm ‘nâu, ĭnh bơnê kơ khŭl kơdră chĕp kơ̆l hlôi bơngơ̆t truh vei lăng jĭ Covid-19 hloh dôm khei kơ âu bơ̆ih, kơna lơ̆m năr Nôel âu dăh mă et pơkong tă kơ pơgơ̆r sơđơ̆ng ‘lơ̆ng ngăl. ‘Meh Nôêl roi chơt hơ iă păng tơ nŏ hiôk, nhôn hơvơn khŭl tôn chĭng chêng vang pơchơt hơdai.”

Yă Liêng Jrang K’Sáu - Kơdră Khŭl vei lăng kon pơlei jang chŭn mir xăh Dà Sas, apŭng Lạc Dương tơbăt: Lơ̆m kơplăh pơjing tơring tơrang ‘nao, hơdai hăm hơnăp jang đơ̆ng rim khŭl grŭp tơpôl, rim bơngai pơtho lui lơ̆m tơring hlôi krao hơvơn kon pơlei kiơ̆ lui hơdrin vang jang. Lơ ŭnh hnam hlôi plang song teh pơm trong nơnăm, hơdrin vang jang. Gơnang đơ̆ng noh, um ai tơring tơrang hlôi tơplih ‘lơ̆ng. Yă Liêng Jrang K’Sáu - Kơdră Khŭl vei lăng kon pơlei jang chŭn mir xăh Dà Sas pơma hơdăh: vă đĭ đăng kon pơlei kiơ̆ lui tơ̆ âu ưh khan lăp pơm kiơ̆ tơpăt trong jang đơ̆ng Đảng păng teh đak mă oei arih ƀlep hăm tơdrong kăl “ arih sa ‘lơ̆ng lui kơ jăp”:

“Đe ƀok pơtho lui đe sư ling lang jĭ bơngai năm hơdrol, pơm jŭk yŭk trong hơlâu lơ̆m tơdrong pơm kiơ̆ ‘lơ̆ng trong jang tơgŭm đơ̆ng Đảng, khôi luơ̆t đơ̆ng teh đak, hơdrin vang jang dôm tơdrong krao hơvơn, vang truh hop akŏm yua đơ̆ng khŭl kơdră tơring pơgơ̆r vă krao hơvơn kon pơlei đei lui pơm kiơ̆ ‘lơ̆ng”.

Lăp oei pă 1 giĕng dơ̆ng ‘noh yak mơ̆t lơ̆m sơnăm ‘nao 2023, mĭnh pơyan Nôel dơ̆ng ‘noh truh. Lơ̆m dôm năr âu ki, kơdră chĕp kơ̆l Lâm Đồng păng rim tơring lơ̆m dêh char hlôi năm ngôi, hmach chơt hơiă kơ Nôel tơ̆ dôm hnam hơkŭm, chih iŏk păng lăng ‘lơ̆ng dôm tơdrong vang tơgop đơ̆ng dôm ƀok pơtho lui păng kon pơlei kiơ̆ lui lơ̆m rim tơdrong jang mŭk drăm - tơpôl, hơtŏk tơiung pơm tơlĕch, tơiung ming mŭk drăm. Kơdră chĕp kơ̆l dêh char Lâm Đồng pơma hơdăh khŭl kơdră rim tơring ling lang tơgŭm, pơm tơdrong hiôk ‘lơ̆ng hloh vă kơ dôm khŭl lui hơkŭm pơhrăm. Păng ‘meh vă đe ƀok soi, mŭk sư, dôm bơngai pơtho lui hơnơ̆ng hơtŏk jơhngơ̆m đon lui kơ Kră yang, ‘mêm kơ teh đak, krao hơvơn kon pơlei kiơ̆ lui jang sa, hơtŏk ‘lơ̆ng tơdrong arih sa păng hơdrin vang jang pơjing grŭp 1 ƀơ̆r đon hơdrĕch hơdrŭng.