Kiơ̆ đơ̆ng Hơnih vei lăng Jang ka hơdang păng Đak dơsĭ achon dơsĭ dêh char Dak Lăk, lơ̆m năr 5 Têt, hlôi đei 10 tong duk rôp ka ngư đak dơsĭ hlôi vih tơ̆ dơnŏk duk, hăm rôp đei 50 tân ka. Tơchĕng lăng lơ̆m khei năr kơnh, dang 70 tong duk rôp ka hơdang hơnơ̆ng brŏk vih, pơhlom năng jang sa iŏk đei ka lơ hloh lơ̆m sơnăm. Kiơ̆ chă hơlen đei ƀôh, rim tơ-‘ngla duk păng dôm bơngai jang lơ̆m duk pơm kiơ̆ kơjăp rim tơdrong tơchơ̆t lơ̆m chă rôp ka hơdang tơ̆ đak dơsĭ. Đơ̆ng năr 5 Têt, tơ̆ dơnŏk duk rôp ka hơdang Đông Tác, lơ duk rôp ka đak dơsĭ hlôi vih truh tơ̆ dơnŏk hăm jơhbngơ̆m đon chơt hơ iă ‘nă hal. Dôm bơngai mơdro, hơnih mơdro sa răt iŏk hlôi năm tơ̆ ou đơ̆ng hrôih vă răt iŏk ka hơdang mưh duk vih truh. Hơnih tĕch mơdro tơbăt, ka ngư rôp đơ̆ng đak dơsĭ Trường Sa pơyan ou tôch kơ ‘lơ̆ng, đei rim teh đak răt rơih kơtang nhen châu Âu, Mi păng Nhật Bản lŭ lăp.

Đơ̆ng rŏng kơ Tết Nguyên đán, tơ̆ dôm tơnŏk jang ka lơ̆m dêh char Khánh Hòa, kơhrĕng tŏ ƀato yâu ka oei hơmet ăn ‘măng năm jang tơ̆ đak dơsĭ ƀât blŭng sơnăm ‘nao. Hơdai hăm đon hơmĕng jang đei ka lơ, kon pơlei roi hơtŏk đon kơchăng pơm kiơ̆ dôm tơdrong hơgăt tang găn rôp yâu ka glăi luơ̆t IUU, năm truh tơdrong jang ka tŏk pran kơjăp. Tơ̆ tơnŏk ka Hòn Rớ, đơ̆ng pơgê hrôih, lơ ƀato yâu ka đei tuh hơmet đak dâu, tăh ming prel, hơnhuăl păng hơlen tôm tơmam adrol vă lĕch tơ̆ đak dơsĭ. Đơ̆ng rŏng kơ tơmât hơdai păng chih hơdăh rim kơsô̆ jang xa, lơ̆m dêh char Khánh Hòa dang ei đei dang 5.200 tŏ ƀato yâu ka đei pơm hla ar, chih tơbăt kơsô̆ păng ƀơk ăn hla ar năm jang, iŏk đei 100%. Tơdrong vei lăng ƀato ‘lơ̆ng gô tơgŭm ăn tơdrong yâu ka, chih hơdăh tơring yâu vă tang găn tơdrong jang xa glăi luơ̆t roi ‘lơ̆ng đơ̆ng blŭng hloi. Sơnăm 2025, ka hơdang rôp yâu đei đơ̆ng Khánh Hòa đei hlŏh 238 rơbâu tân, jên tĕch tơ̆ teh đak đe iŏk đei dang 870 triu USD.