VOV4.Bahnar - Dơnŏ anĭh vei lăng Mơdro sa dêh char Kon Tum tơbăt, lơ̆m ‘mi kial hơbŭt kơsô̆ 9 sơnăm 2020, Kŏng ty hnam kmăi đak tơlĕch ŭnh hơyŭh Đức Nhân - Đak Psi păng Kŏng ty Đức Thành Gia Lai hlôi bơ̆ jang vei lăng dơnau mong đak ư̆h kơ ƀlep tơdrong tơchơ̆t pơm ăn đak tŏk kơtang pơm hiong răm găh mŭk drăm, ‘long pơtăm kơ 62 ŭnh hnam kon pơlei oei tơ̆ tơring Đak Long păng Đak Pxi, apŭng Đak Ha.

Kon pơlei chro tơƀô̆h hơnĭh đak lơ̆p hnam kơ yuơ hnam kmăi đak tơlĕch ŭnh hơyŭh lê̆ đak tŏk blai

Trŭh dang ei, vă jê̆ 2 sơnăm đĭ kơtĕch, mă lei 62 ŭnh hnam kon pơlei đei mŭk drăm, ‘long pơtăm hiong răm oei tim mă sơng iŏk đei tơdrong hrŭ ăn, tơgŭm djru ayơ ‘mơ̆i. Tơdrong tơm ‘nŏh kơ yuơ Kŏng ty Đức Thành Gia Lai akhan tơdrong ‘nau jĭ kơ yuơ đơ̆ng ‘mi kial pơm ăn, ư̆h khan kơ yuơ đơ̆ng hnam kmăi đak tơlĕch ŭnh hơyŭh pơm ăn kơna tim mă tơnăp lơ̆m bơ̆ jang chĕp pơgơ̆r, iung jang hơdoi ... dăr lăng, lăng hơlen, chĭh jô̆ tơdrong hiong răm vă jang kiơ̆ tơdrong hrŭ ăn, tơdjru ăn. Dơnŏ anĭh vei lăng Mơdro sa dêh char Kon Tum gô tơbăt ăn Dơnŏanĭh vei lăng kon pơlei dêh char Kon Tum athei Hơnĭh tơm Hnam kmăi ŭnh hơyŭh Tơring Tŏk bŏk pơdơ̆h hloi tơgoăt iŏk ŭnh hơyŭh đơ̆ng hnam kmăi au tơdăh tơngla hnam kmăi đak tơlĕch ŭnh hơyŭh ư̆h kơ pơm kiơ̆ tơdrong hrŭ ăn, tơgŭm djru ăn 62 ŭnh hnam kon pơlei.

Tơblơ̆ nơ̆r: Amazưt