VOV4.Bahnar - Tơ̆ hơ năp tơ drong jur tŏk đơ̆ng chă pơ dro tĕh tôch dêh khei ‘năr tơ jê̆ âu, vă vei sơ đơ̆ng ăn tơ drong asong tŏk iŏk jên, Anih mong jên tĕh đak tơ̆ Kon Tum athei rim anih asong tŏk iŏk jên tơ̆ dêh char kơ chăng hăm tơ drong tŏk iŏk jên pơ dơ̆ng hăm tĕh, tŏk iŏk jên vă răt tĕh. 

Kiơ̆ kơ ‘nŏh, Anih mong jên tĕh đak tơ̆ Kon Tum athei dôm anih asong tŏk iŏk jên hơ len năng kơ jăp tơ drong pơm hla ar tŏk iŏk jên ƀơm truh tơ̆ tĕh, mă loi hăm tơ drong tŏk iŏk jên vă răt tĕh; athei kơ chăng set hơ len mă brĕ hăm dôm hla ar apinh tŏk iŏk jên vă răt tĕh tơ̆ dôm tơ ring oei đei lơ bơ ngai chă răt păng tĕch tĕh, dôm tơ drong jang đei lơ tơ drong krê... 

Athei dôm anih asong tŏk iŏk jên hơ len năng hla ar, hơ len năng kơ jă tơ mam vă pơm ‘lơ̆ng ăn rim tơ mam ‘nŏh jĭ tơ drong gơ̆h iŏk yoa tĕh, iŏk yoa tơ mam đei kơ pal tĕh ‘nŏh.

Dơ̆ng: Tơ blơ̆