Tơ̆ jơ pơm lêh, kơdră chĕp kơ̆l dêh char Kon Tum pôk pơ ư anih jang pơtho pơhrăm kŭm hăm khŭl thây kô pơtho kơ dêh char lơ̆m dôm sơnăm âu ki hlôi tơlĕch jang, bơ̆jang kiơ̆ hrơ̆ch 1 ‘măng dôm hơnăp jang, trong jang găh tơplih ‘nao, tôm tơdrong pơtho pơhrăm tơ̆ tơring. Ƀôh hơdăh ‘noh jĭ pơvei kơjăp tơdrong jang pơtho mầm non ăn hơioh 5 sơnăm, pơtho pơhrăm jăl 1 păng jăl 2; dôm tơdrong jang pơjei băl pơtho păng hŏk, pơtrŭt hŏk, pơtrŭt hơgei, pơjing tơpôl hŏk pơhrăm đei bơngơ̆t truh.

‘Măng âu, thây pơtho Thái Khắc Hoà, Kơdră Hơnih vei lăng găh pơtho pơhrăm pơlei tơm Kon Tum chơt hơiă sơng iŏk hơnăn Bơngai pơtho hŏk gơh hơgei yua đơ̆ng Kơdră teh đak pôk hơpăh. Anih tơm vei lăng găh pơtho pơhrăm hơpăh ƀăng khen 2 ‘nu bơngai pơtho hŏk hơgei sơnăm 2024 tơ̆ dêh char Kon Tum; Kơdră Anih vei lăng kon pơlei dêh char Kon Tum hơpăh Hla kơ Pơjei băl sơnăm hŏk 2023-2024 ăn kơ 16 khŭl tơpôl.