VOV4.Bahnar - Khei năr au ki, bơ̆ jang vei lăng groi tĕh tơ̆ Kon Tum hlôi ƀô̆h lơ twodrong ư̆h kơ lăp, bơ̆ jang ư̆h kơ ‘lơ̆ng, đei ‘măng pơrơ̆ng “Pơm tơdrong tơhlăk tơhlĭn”. Trŭh po đơ̆ng rŏng pơm ăn brăh brư găh groi tĕh, hiong răm mŭk drăm Tĕh đak, pơm ăn kon pơlei pă gan lui lơ̆m khŭl bơ̆ jang veu lăng groi tĕh kơ tơring.

Tĕh pơgar yă Nguyễn Thị Thanh Thúy răm hơnĭh bơ̆ jang ƀơk hla bơar pơm tơngla tĕh ăn kơ ‘nhŏng Nguyễn Tăng Trung.

Đunh kơ au 4 khei, lơ̆m mă bơ̆n Hla bơar pơm tơngla tĕh pơgar hnam, mŏ Nguyễn Thị Thanh Thúy oei tơ̆ tơring Chư Hreng, pơlei tơm Kon Tum ƀô̆h tĕh ŭnh hnam hlôi đei hơnĭh bơ̆ jang pơm hla bơar pơm tơngla tĕh ăn mĭnh ‘nu bơngai nai. “Mư̆h ĭnh ƀô̆h ‘nŏh ĭnh jei pơm hla bơar tơbăt ăn Dơnŏ anĭh vei lăng kon pơlei tơring. Dơnŏ anĭh vei lăng kon pơlei tơring tơl akhan, đe sư ư̆h kơ gơ̆h xek tơlang tơdrong au. Athei ĭnh pơm hla bơar pơtrŭh ăn Dơnŏ anĭh vei lăng kon pơlei apŭng. Mĭnh khei bơih tim mă ƀô̆h Dơnŏ anĭh vei lăng kon pơlei kơ pơlei tơm tơl hơdăh. ‘Nao au ki khŭl kơdră tang măt tơƀơ̆p bơngai tăh hla ĭnh jei đei nơ̆r pơma jei tơl akhan, tơdrong au ư̆h kơ đei kăl ôh. Chă apĭnh kơdră kơpal ‘nŏh xek tơlang ăn hloi, ư̆h kơ đei tơnap tap yă kiơ ôh. Mơ suơ̆l mơ soăl, ba jei oei chă jang sa rong kon hơ ‘lơ̆p văi”.

‘Nao au tơ̆ ‘măng hop akŏm mă 3, Jơnŭm vei lăng kon pơlei dêh char Kon Tum jăl XII, Bí thư Đảng dêh char, Kơdră chĕp pơgơ̆r Dơnŏ anĭh vei lăng kon pơlei dêh char Kon Tum Dương Văn Trang apĭnh hơlen Dơnŏ anĭh vei lăng kon pơlei thĭ trân Đak Ha, apŭng Đak Ha ăn kơ ƀok Đỗ Trọng Lâm, oei tơ̆ trong Hùng Vương mơng tĕh đơ̆ng sơnăm 2017. Dang ei, lơ̆m pơgar tĕh au ƀok Lâm man pơnơ̆ thong hơbong, man hnam tĕch mơdro. Ƀok Ka Ba Thành, Bí thư Đảng apŭng Đak Ha pơma hơdăh: Tơdrong mă au hlôi pơm kơnê̆ tôch tĭh tên ăn tơdrong pă gan yom kơtang khŭl kơdră tơring:“Kon pơlei lơ̆m tơring akhan, tơdăh kơdră tơring ư̆h kơ ăn lei pă sư pơ̆n chă pơm bơ̆n hnam au. Păng đơ̆ng rŏng dăr lăng hơlen ‘nŏh ƀlep tơpă mơ̆n khŭl kơdră thĭ trân bơ̆ jang ư̆h tơnăp. Mư̆h đei ƀô̆h tơdrong au ư̆h kơ tom xek tơlang mă lei oei lê̆ ƀok au ming man pơm ăn trŭh ‘nŏh kon pơlei jau kơdră chĕp pơgơ̆r ăn asong ƀok au ming man”.

Hơgăt tĕh Dơnŏ anĭh vei lăng kon pơlei thi trân Đak Ha ăn mơng, ƀok Đỗ Trọng Lâm ming man hnam tĕch mơdro Con Cưng vă mơdro sa.

Đei ƀơm trŭh tơdrong vei lăng groi tĕh tơ̆ dêh char Kon Tum, tơ̆ Nơ̆r pơma pơtôch ‘măng dăr lăng kơsô̆ 222 năr 18/2/2022 kơ Dơnŏ anĭh Dăr lăng kơ Khŭl kơdră tĕh đak hlôi tơƀô̆h hơdăh lơ tơdrong jang ư̆h kơ ‘lơ̆ng, pơm glăi, nhen: 2016- 2019, Dơnŏ anŭh vei lăng kon pơlei dêh char Kon Tum hiơ hiơ̆ kĭ tơchơ̆t trong vă jang iŏk yua tĕh kơ 10 apŭng, pơlei tơm; 85 ‘nu bơngai pơjao tĕh ư̆h kơ pơm kiơ̆ tơdrong rơ̆ih bơngai răt iŏk tơ̆ apŭng Đak Ha; Tơdrong vă jang Hơnĭh tĕch mơdro tơmam drăm, pơchơt pơ hiơ̆ păng Hnam kơphô̆ kơ yuơ Kŏng ty Grŭp jang FLC pơm tơngla tơmơ̆t jên jang tim mă pơm keh đang hla bơar apĭnh pơm tơngla tĕh, dêh char KOn Tum hlôi ƀơk ăn Hla bơar Pơm tơngla tĕh, hnam oei, mŭk drăm tơklep hăm tĕh păng kơ dĭh chĕng iĕ lơ̆m hơgăt tĕh 17.600m2; Tơdrong pơjao tĕh ăn 43 ‘nu bơngai oei tơ̆ Hơnĭh oei kơdrơ̆m găh Pơbăh gơng Đak Bla, dêh char Kon Tum ư̆h kơ lơ̆m dôm bơngai ăn năm oei ... Atŭm hăm ‘nŏh dôm tơdrong bơ̆ jang ư̆h kơ ‘lơ̆ng, ư̆h kơ ƀlep lơ̆m bơ̆ jang pơ prŏ, vei lăng pơ prŏ jang, iŏk tơvĭh tĕh adoi nhen tơdrong hiơ hiơ̆ hơmet pơ ‘lơ̆ng, xek tơlang glăi pơm ăn kon pơlei Kon Tum pă gan lui lơ̆m khul kang ƀô̆ bơ̆ jang vei lăng groi tĕh kơ tơring. Yă Phạm Thị Vân Kiều, hnam oei tơ̆ pơlei tơm Kon Tum đei tĕh lơ̆m hơnĭh pơ prŏ vă jang tơdrong anai pơma:“Tơ̆ yơ jei lê̆ vă pơ prŏ jang. Kon pơlei ‘mĕh vă erĭh sa lơ̆m groi tĕh kơ dĭh mă lei dang ei pơ prŏ vă jang tơdrong anai ư̆h kơ ăn jang sa lơ̆m hơget tĕh bơ̆n ‘nau kơna pă băt vă lui lơ liơ bơih, tơ̆ yơ jei pơ prŏ vă jang, tơ̆ yơ jei vă iŏk tơ vĭh tĕh ngăl”.

        Ƀok Phạm Văn Trúc, kang ƀô̆ so oei tơ̆ hnam kơsô̆ 217, trong Hùng Vương, thĭ trân Đak Ha, apŭng Đak Ha pơma:“Trung ương ‘nŏh bơ̆ jang tôch kơ dêh, kon pơlei nhôn lui kiơ̆, yom kiơ̆ kơ jăp. Mă lei hăm mĭnh ‘nu kon pơlei, mĭnh ‘nu đảng viên lơ̆m dêh char Kon Tum ‘nŏh ĭnh ƀô̆h lơ lau, tơdrong jang au, khŭl kơdră dêh char tim mă lăng ba kơ jăp. Lơ tơdrong ư̆h kơ ‘lơ̆ng hlôi ƀô̆h lăng đơ̆ng rŏng dăr lăng hơlen hlôi đei tơdrong hlôi pơm kiơ̆ nơ̆r pơma pơkăp dăr lăng ‘nŏh nhen lĕ tim mă pơm kiơ̆ ‘mơ̆i. Đei hơnĭh tơbăt akhan tơnap dêh kơna chă hơmet ming dar deh. Hơpơi, tơdrong mă au kăl xek tơlang trŭh tơ̆p trŭh troch hloi”.

        Tơjê̆ au tơ̆ rim ‘măng hop akŏm, nhen: ‘Măng hop akŏm mă 3, Jơnŭm vei lăng kon pơlei dêh char Kon Tum jăl XII; Hop akŏm pơma dơnŭh đơ̆ng Dơnŏ anĭh vei lăng kon pơlei dêh char Kon Tum hăm hơnĭh mơdro sa; Hop akŏm kơ Dơnŏ anĭh Đảng dêh char Kon Tum hơlen hơdăh pơtôch jang kiơ̆ hơmet ming trong bơ̆ jang, hơmet pơ ‘lơ̆ng trong jang tơmơ̆t jên jang ..., Kơdră chĕp pơgơ̆r Đảng, Jơnŭm vei lăng kon pơlei, Dơnŏ anĭh vei lăng kon pơlei dêh char Kon Tum hlôi tơbăt hơdăh jơhngơ̆m đon kơrŭn đĭ jơhngơ̆m vă xek tơlang dôm tơdrong pơm glăi, hơmet pơ ‘lơ̆ng tơdrong jang tim mă lăp, xek tơlang kơ hret hăm rim bơngai bơ̆ jang ư̆h kơ ‘lơng pơm tơhlăk tơhlĭn, mơmat tat ăn kon pơlei, hơnĭh mơdro sa năm pơm hla bơar đei ƀơm trŭh groi tĕh. Mă lei, vă iŏk đei dơ̆ng jơhngơ̆m đon lui kiơ̆ kơ jăp đơ̆ng kon pơlei lơ̆m tơdrong jang vei lăng groi tĕh ‘nŏh ư̆h khan lăp hơdrô̆ ƀơ̆r pơma hơdrin đĕch tim tôm ‘mơ̆i, mă lei rim hơnĭh bơ̆ jang, kơdră chĕp pơgơ̆r rim tơring kơ dêh char Kon Tum kăl sơđơ̆ng ư̆h kơ lê̆ đei tơdrong kơrŭn đĭ jơhngơ̆m, trong chĕp pơgơ̆r đơ̆ng kơdră kơpal huŏng lơ̆m tơdrong “kơpal ngiơ ngiĕk, hơla pơm rơdu” dăh mă “ra sơgơ̆r hŭt tơlŏ”.

Bơngai chĭh: Khoa Điềm

Tơblơ̆ nơ̆r: Amazưt