VOV4.Bahnar - Khul linh jang kơ pal kơ apŭng Kon Plông, dêh char Kon Tum oei hăt dăr hơ len 1 tơ drong kŏh phă bri ‘nao tơ̆ thĭ trơ̆n Măng Đen. Nơ̆r tơ roi blŭng a đei băt tơ drong kŏh phă bri đei Dơ nŏ anih vei lăng kon pơ lei thĭ trơ̆n Măng Đen chă ƀôh ‘năr 3/3/2022 tơ̆ lô 2 păng 3, anih 11, tơ ƀôt bri 486, tĕh bri ‘long âu găh tơ drong vei lăng kơ Dơ nŏ anih vei lăng kon pơ lei thĭ trơ̆n Măng Đen. 

Anih đe kŏh phă bri ‘long

Truh ‘năr 8/3/2022 dôm anih jang kơ pal kơ apŭng Kon Plông truh hơ len năng ƀât anih đe kŏh phă ‘long bri, chih jô̆ đei 26 tơm ‘long đe kŏh păk, lơ̆m noh đei bơ̆n ‘long tang, ‘long tơ ƀăr găh grŭp V păng grŭp VI. ‘Long tih đơ̆ng 30cm - 80cm. Rim tơm bơ ngai kŏh lăp ret iŏk tơm tih đĕch, oei dơng, kơ nhŏng iĕ ‘nŏh hŭt lê̆ tơ̆ nŏh. Lăng kiơ̆ trong gre năm, đe akhan đe chơ ‘long âu năm tơ̆ apŭng Kon Rẫy. Dang ei tơ drong kŏh phă bri tŏk bŏk đei Anih jang kơ Kanh sat dăr hơ len, Công an apŭng Kon Plông păng Anih vei lăng bri ‘long apŭng Kon Plông, dêh char Kon Tum dăr hơ len, pơm hơ dăh.

Dơ̆ng: Tơ blơ̆