VOV4.Bahnar - Đơ̆ng rŏng kơ ‘mi kial kơ sô̆ 4, tơ̆ apŭng Tu Mrông, dêh char Kon Tum hơ nơ̆ng đei đak tih đơ̆ng găh tu ro truh pơm ăn đak lơ̆p trong yak vih vât mât lĕch tơ̆ 3 xăh lơ̆m apŭng Tu Mrông, đei: Măng Ri, Đăk Na păng Đăk Sao. 3 xăh âu dang ei đei hlŏh 8.000 ‘nu kon pơ lei. ‘Ngoăih kơ ‘nŏh tơ̆ xăh Tê Xăng, yoa tĕh hơ lih đơ̆ng kông, tĕh tơ mo găn đĭ trong yak kơ na 147 unh hnam kon pơ lei tơ̆ plei Tu Thó ưh gơ̆h năm mât lĕch tơ̆ nai.

Hơ met pơ ‘lơ̆ng trong yak vih vât, mât lĕch tơ̆ apŭng Tu Mrông

Ƀok Võ Trung Mạnh, Kơ dră vei lăng kon pơ lei apŭng Tu Mrông ăn tơ băt, khul kơ dră tơ ring krao akŏm lơ khul bơ ngai jang hơ met pơ ‘lơ̆ng trong. Mă hơ dăh, hăm trong năm tơ̆ Măng Ri, Dơ nŏ anih vei lăng kon pơ lei apŭng pơ tho ăn linh dân quân, công an, druh dăm năm tơ gŭm ăn kon pơ lei, tung gre, tŭn gre hlôi gơng hơ lih, đak hoch. Dang ei oei pă hơ drô̆ plei Tu Thó, xăh Tê Xăng đĕch oei ưh đei trong mât lĕch hăm plei nai. Khul jang kơ pal oei hơ tŏk hrĕnh tơ drong hơ met pơ ‘lơ̆ng ming.

VOV Tây Nguyên – Dơ̆ng tơ blơ̆