VOV4.Bahnar - Oei tam mă truh 1 khei dơ̆ng ‘noh pơ gơ̆r ‘măng pơ long tốt nghiệp jăl 3, tơ̆ dêh char Kon Tum lơ̆m khei ‘năr hăt hot âu, dôm hnam trưng hŏk tŏk bŏk hơ tŏk loi dơ̆ng ôn ƀai, pơm sơ đơ̆ng jơ hngơ̆m ‘lơ̆ng tơ gŭm hŏk tro pơm ƀai ‘lơ̆ng hloh dơ̆ng. ‘Măng pơ long tốt nghiệp jăl 3 sơ năm ‘nâu dêh char Kon Tum đei hloh 4.700  ‘nu hŏk tro chih măt vang pơ long. Vă hơ len lăng ƀlep tơ drong hŏk găh đơ̆ng hŏk tro, Anih vei lăng găh pơ tho pơ hrăm dêh char Kon Tum athei rim hnam trưng pơ gơ̆r ăn kơ đĭ đăng hŏk tro lăm 12 pơ long lăng vă hơ len lăng, dăr lăng vă tơ tom tơ mơ̆t dơ̆ng, hơ met ming ƀai ôn pơ long rim môn tơ gŭm hŏk tro ƀônh hlôh ƀai pơ tho. Anih vei lăng gơh pơ tho pơ hrăm dêh char Kon Tum tơ chĕng hơ drol pơ jing 12 hơ nih pơ long, hăm 203 lăm pơ long, 41 lăm gô păng hơ met hiă. Vă ‘măng pơ long pơ gơ̆r sơ đơ̆ng, tơ păt, ƀlep tơ drong hơ găt, Khŭl pơ gơ̆r ‘măng pơ long tốt nghiệp jăl 3 sơ năm 2022 dêh char Kon Tum kŭm hlôi tơ lĕch ăn trong jang vei sơ đơ̆ng ‘lơ̆ng ăn hŏk tro tơ ring hơ tăih hơ tŏ lơ̆m kơ plăh năm pơ long păng hơ nih sŏng sa, ƀĭch pơ dơh. Hơ met ăn dôm hơ nih pơ long lăp hăm tơ drong yan âu păng hiôk ăn hŏk tro.

Thuem: Tơ blơ̆