VOV4.Bahnar - Anih jang vei lăng kon pơ lei dêh char Kon Tum ‘nao đei hla ar gơ̆ih kơ rim anih jang păng Anih vei lăng kon pơ lei dôm apŭng, pơ lei tơm găh tơ drong hơ tŏk loi dơ̆ng tơ drong jang tang găn glơ̆k kơ đak ăn hơ ioh tơ̆ tơ ring. Kiơ̆ kơ ‘noh Anih vei lăng kon pơ lei dêh char Kon Tum athei Anih vei lăng kon pơ lei 10 apŭng, pơ lei tơm pơ gơ̆r, rim xăh, phường, thị trấn pơ jing trong tơ lĕch jang hơ dăh găh tang găn tơ drong truh, jĭ rơ ka ăn hơ ioh păng mă kăl ‘noh lăng truh tơ drong tang găn hơ ioh đei lôch yua đơ̆ng glơ̆k kơ đak.

Hơ ioh hum đak krong Đăk Bla hơ mơt kơ đei ƀôh glơ̆k kơ đak

Athei rim anih jang, khŭl tơ pôl tơ̆ tơ ring vang jang vei lăng hơ ioh lơ̆m khei ‘năr ưh kơ truh tơ̆ hnam trưng hŏk, lơ̆m năr pơ dơh he, dôm khei ‘năr ‘mi kial hơ bŭt. Tơ roi tơ băt, krao hơ vơn dôm ŭnh hnam lơ̆m tơ drong pơ jing hnam sơ đơ̆ng ‘lơ̆ng ăn hơ ioh, hơ nơ̆ng bơ ngơ̆t truh, dăr hơ len lăng hơ ioh. Tơ lĕch jang hơ len lăng, dăr lăng păng pơm kơ ƀang roi tơ băt krê hơ mơt, pơm var găn tơ̆ dôm hơ nih đei hơ mơt nhen hơ lŭng đak, dơ nâu đak, đak glung đak krong, hơ nih tŏk bŏk pơm, dôm hơ nih krê hơ mơt tơ̆ tơ ring vei lăng.

Thuem: Tơ blơ̆