VOV4.Bahnar - Vă tang găn tơdrong sir tơtông chuơ̆h, lơ̆m dôm sơnăm au ki dêh char Kon Tum hlôi pơgơ̆r tơchă bơngai tơmơ̆t jên jang, ăn hla bơar asong kôch iŏk chuơ̆h mơjĭt hơnĭh iĕ lơ̆m rim thoong đak kroong. ‘Ngoăih đei iŏk yua trŏ lăp ‘nŏh lơ hơnĭh iĕ sir iŏk chuơ̆h hlôi pơm glăi pơm tŏ đon kon pơlei. Tơdrong tơm pơm ăn tơdrong au ‘nŏh tơdrong vei lăng năng tông sir iŏk chuơ̆h ư̆h tơnăp, đei ‘măng dŏng tơgŭm dôm bơngai pơm glăi, ôn tơdrong pơm glăi.

Mĭnh jăl trong jĭh thoong đak kroong Pô Kô Kŏng ty Lĩnh Vũ pơrơ̆ng chưk

Hơnĭh iŏk kôch iŏk chuơ̆h tơ̆ đak kroong Pôkô, jăl thoong đak kroong găn hlŏh pơlei Kà Nhảy, tơring Dak Nông, apŭng Ngọc Hồi đei Dơnŏ anĭh vei lăng kon pơlei dêh char Kon Tum ăn asong hla bơar kôch iŏk đơ̆ng khei 11/2018 ăn Kŏng ty Lĩnh Vũ. Kiơ̆ đơ̆ng kon pơlei lơ̆m tơring, đơ̆ng mă tim mă đei ăn asong hơnĭh jang au chă kôch iŏk chuơ̆h, kơ dĭh chưk trong atăih 100m ‘moi kiơ̆ đak kroong Pô Kô găn hlŏh hơgăt tĕh kơ vă jê̆ 10 ŭnh hnam kon pơlei tŏk bŏk jang sa. Ƀok Lê Văn Kha pơma tơ jră hăm tơdrong au ‘nŏh ƀok A Veo bơngai tơngla hơnĭh kôch iŏk chuơ̆h krao đe năm tĕh dong. ‘Nhŏng Kha tơbăt, tơdrong mă au trŭh dang ei tim mă xek tơlang đang: “Ĭnh brŏk ĭnh ƀô̆h trong lơ lau ‘nŏh ĭnh jur ĭnh hơtơ̆p hơdrơ̆ng var groi tĕh ĭnh ‘nŏh ƀok A Veo krao đe năm tĕh dong ĭnh. Lơ̆m mă nŏh đei 2 ‘nu kang ƀô̆ ƀô̆h kơ măt đe tĕh ĭnh. Ĭnh tơroi tơ̆ tơring, Dơnŏ anĭh vei lăng kon pơlei tơring nhen lĕ dŏng xek tơlang kiơ̆ trong ‘lơ̆ng hơ iă kơ ƀok A Veo”.

Đơ̆ng pơm glăi ư̆h kơ đei tang găn tơtom dang ei iŏk đei hla bơar ăn asong jang, Kŏng ty Lĩnh Vũ hơnơ̆ng đei tơdrong jang pơm kơnê̆ trŭh tơdrong erĭh sa kơ kon pơlei, nhen: ư̆h kơ pơm kiơ̆ ƀlep tơdrong tơchơt ăn sir iŏk găh jơ ‘năr; chơ pơdŭ chuơ̆h lơ̆m pơyan phang ‘mui kơ ŭl kơ ăl, pơyan ‘mi pơm ăn trong hlŭt hleng. Đei ‘măng hơnĭh mơdro sa au oei iŏk tĕh tơmo bơ̆ hơlŏng đak trong glung Hồ Chí Minh vă gre chơ chuơ̆h hiôk hian. ‘Nhŏng Lê Văn Tường hnam tơjê̆ trong gre chơ chuơ̆h kơ hơnĭh kŏng ty lĕch tơ̆ Trong glung Hồ Chí Minh, tơtăm: “Đĭ đăng gre tĭh ngăl, gre 4 tŏ jơ̆ng kơdau pơm ăn hnam măh tơdrŏ, kon hơkăn tep tơ̆ gơmăng măh tăr văr. ‘Mui tôch kơ dêh. Hnam bơ̆n tang ‘măng hơnơ̆ng. Tơ̆ hơnăp đei trong glung Hồ Chí Minh, sơ̆ đei bơ̆ dang ei đe plôih hŭt vă ăn gre chơ chuơ̆h. Chơ tĕh, chơ tơmo bơ̆ hê̆ pơyan ‘mi ‘nŏh đak ư̆h kơ ro kiơ̆ thoong, lăh ro năm tơ̆ hnam”.

Kŏng ty Lĩnh Vũ ƀŭ hơlŏng đak trong glung Hồ Chí Minh vă gre kơdau hiôk

Atŭm hăm đei ƀơm kơnê̆ trŭh tơdrong erĭh sa kơ kon pơlei, tơ̆ mĭnh ƀar hơnĭh sir iŏk iĕ lơ̆m dêh char Kon Tum oei đei lơ tơdrong pơm glăi.

        Mă hơdăh ‘nŏh hơnĭh iĕ kôch iŏm chuơ̆h, tơmo lơ̆m đak kroong Đak Pơxi, jăl thoong đak găn hlŏh thôn 7, tơring Đak Pơxi, apŭng Đak Ha. Kiơ̆ hla bơar tơchơ̆t ăn asong kôch iŏk chuơ̆h tơmo kơsô̆ 898, năr 15/9/2020 Dơnŏ anĭh vei lăng kon pơlei dêh char Kon Tum ƀơk ăn, ‘nŏh Kŏng 87 lăp gơ̆h hyup iŏk chuơ̆h đĕch.

Mă lei hơnĭh au hlôi iŏk yua gre pơm trong kơ hrĕng met bơ̆ găn đak kroong vă hyup iŏk chuơ̆h pơm tơplĭh thoong đak ro. Tpơdrong chrĭh dơ̆ng, mă đơ̆ng hơ nĭh iĕ sir iŏk atăih kơ Dơno anih bơ̆ jang tơring Đak Pơxi hlŏh 1km, mă lei ƀok Trần Phước Tuấn, Kơdră chĕp pơgơ̆r Dơnŏ anĭh vei lăng kon pơlei tơring sơkơt hơdăh akhan ư̆h kơ băt: “Găh tơring bơ̆n ‘nŏh hơnơ̆ng pơrô̆ athei ‘nhŏng ŏh dăr lăng hơnơ̆ng mă lei dang ei tim mă ƀô̆h yă kiơ”.

        Găh Anih jang Mŭk drăm păng Cham char apŭng Đăk Hà, ƀok Đinh Khánh Hoàng, Phŏ Kơdră Anih jang ăn tơbăt, tơ̆ anih sir kôch chuơh tơ̆ đak krong Đăk Pxi, jăl găn thôn 7, săh Đăk Pxi kơ Kŏng ti 87, anih jang đei ƀôh pơm glăi mă lei hơbŏ kơyuơ  “hơ - ĭ dông” hăm anih jang mŭk drăm noh Anih jang adrô̆ pơdơh tơdrong bơ̆ hla bar vă tơbăt đĕch: “Pơtih nhen đe sư adrô̆ chih măt thŏng, duk, kơmăi kôch chuơh đĕch, lơ̆m kơplăh noh phơ phŏ duh hơ 'nhăk kơmăi sir kôch chuơh truh vă bơ̆ hla bar tơbăt lơ 'măng bơih. Oei đei tơdrong bơ̆ trong vă ăn gre vih vơ̆t truh tơ̆ noh duh hlôi tơroi tơbăt bơih, adoi pơkăl anih vei lăng kon pơlei săh hơlen lăng. Truh dang ei adoi tam mă sek tơlang tơdrong glăi vă minh 'măng”.

Trong tŏk bŏk thoong đak kroong Đak Pơsi Kŏng ty 87 bơ̆ pơm vă kôch iŏk chuơ̆h

Lơ̆m kơplăh noh, đơ̆ng rŏng kơ hơlen Hla bar asong kôch chuơh păng tơdrong đei ƀôh tơ̆ anih kôch, ƀok Võ Thanh Hải, Phŏ Kơdră Anih jang Mŭk drăm păng Cham char dêh char Kon Tum hlôi xơkơ̆t, dôm tơdrong pơm glăi tơ̆ anih kôch chuơh noh hli hlơt mă athei hơlen thu iŏk hla bar pơkăp pơm jang: “Lơ̆m pơkăp ƀok gơh ƀôm đak mă ưh gơh hơ 'nhăk kơmăi kơmŏk, dang kơmăi kơmŏk xir kôch tơ̆ klŏng đak krong, adoi ưh gơh ƀôm kôch hơtŏk tơ̆ thŏng, đơ̆ng thŏng kôch hơtŏk tơ̆ kông, anih akŏm. Bơ̆ trong tơ̆ jih đak krong  pơm ăn đei tơdrong pơm glăi, âu jing tơdrong pơm yoch tơrĕk truh cham char păng pơm glăi sir kôch mŭk drăm cham char. Glăi pơđĭ tơdrong mă âu athei thu iŏk hla bar pơkăp pơm jang”.

            Kơtơ̆ng ang đơ̆ng Anih jang Mŭk drăm păng Cham char dêh char Kon Tum ăn ƀôh, tơdrong pơkăp vei hơlen tơdrong sir kôch mŭk drăm cham char dêh char Kon Tum noh hơdăh hloh. Tơdrong vei lăng adoi kơjăp. Rim 'năr pêng rim giĕng, rim khei păng rim jăl, Anih vei lăng kon pơlei dôm apŭng, pơlei tơm adoi athei tơroi hăm Anih jang Mŭk drăm păng Cham char găh tơdrong vei hơlen kơ tơring. Chŏng mă tơpă dôm tơdrong kiơ tŏk bŏk đei ƀôh tơ̆ lơ anih kôch chuơh lơ̆m tơring kơ dêh char Kon Tum ăn ƀôh, tơdrong vei lăng păng kôch yua, hlôi đei pơkăp ăn tơring, mă lơ anih oei pơhơi, phơ phŏ vei vêr ăn tơdrong pơm yoch glăi.

Bơngai chĭh: Khoa Điềm

Tơblơ̆ nơ̆r: Amazưt