VOV4.Bahnar - Tơ̆ tơring Tây Nguyên, kial hơbŭt kơsô̆ 4 pơm pơrăm găh lơ tơ̆ Kon Tum. Lơ jăl trong tơhlăk tơhlĭn kơ yuơ đak lŏk jrŏh păng tơdrong tĕh tơdrŭt hơlĭh nak.

Rim hơnĭh tĕh tơdrŭt hơlĭh tơ̆ Trong glung 24 hlôi đei kôch hơmet pơ ‘lơ̆ng

Gơnơm tơlĕch jang tang găn hơdrol ‘lơ̆ng kơna lăp đơ̆ng rŏng đei tơdrong răm tơ̆ rim jăl trong, dơnŏ anĭh vei lăng trong gre nơnăm dêh char Kon Tum hăm kơdră chĕp pơgơ̆r rim tơring hlôi hơvơn bơngai, gre, kmăi kmŏk iung jang hơmet pơ ‘lơ̆ng. Mă hơdăh, jăl trong glung Hồ Chí Minh jăl trong găn hlŏh apŭng Đak Glei, tơ̆ hơnăp đak lŏk lơ̆p jrŭ, khŭl bơ̆ jang ăn bơngai gak, hơtơ̆p kơƀang tơbăt ư̆h kơ ăn bơngai păng gre rok trong au vă sơđơ̆ng. Trong glung 40B yak hlŏh apŭng Tu Mrông, Trong glung 24 yak hlŏh apŭng Kon Plông đei lơ hơnĭh tĕh tơdrŭt hơlĭh. Khŭl bơ̆ jang hlôi iŏk yua gre kmăi kmŏk păng bơngai jang iung jang kôch hơmet pơ ‘lơ̆ng, kơna  gre gơ̆h kơdau hiôk hian dơ̆ng.

VOV Tây Nguyên/ Amazưt tơblơ̆ nơ̆r