VOV4.Bahnar - Dơ nŏ anih vei lăng kon pơ lei dêh char Kon Tum ‘nao pơ gơ̆r Hôp roi tơ băt tơ drong tơ lĕch jang tơ drong tơ chơ̆t kơ sô̆ 222 ‘năr 18/2/2022 đơ̆ng Anih dăr hơ len kơ Khul kơ dră tĕh đak. Ƀok Nguyễn Hữu Tháp, Phŏ kơ dră vei lăng kon pơ lei dêh char Kon Tum, ăn tơ băt: Dơ nŏ anih vei lăng kon pơ lei dêh char pơ tho ăn dôm anih jang, tơ ring tơ rang đei ƀơm truh jăh hơ len năng, tơ lĕch trong hơ met pơ ‘lơ̆ng dôm tơ drong ơh kơ lăp mă Anih dăr hơ len kơ Khul kơ dră tĕh đak roi tơ ƀôh. 

Jơ hôp roi tơ băt

Hăm dôm bơ ngai pơm glăi lơ̆m tơ drong vei lăng, iŏk yoa tĕh; Tơ drong vei lăng jên tơ mât jang ming man; Tơ prŏh trong ming man, chĕng hơ met tơ ring kơ drâm… mă Anih dăr hơ len kơ Khul kơ dră tĕh đak hlôi chih tơ băt, Dơ nŏ anih vei lăng kon pơ lei dêh char vă pơ tho ăn dôm anih jang, tơ ring tơ rang jang kiơ̆ mă ‘lơ̆ng, lăp hăm dôm tơ drong hơ găt hrei ‘nâu. Găh tơ drong iŏk pơ gâm hơ năn sâm Ngọc Linh, kơ dră Anih vei lăng choh jang xa păng atŏk tơ iung tơ ring tơ rang dêh char Kon Tum ăn tơ băt, hrei ‘nâu đei lơ khul grŭp, lơ bơ ngai iŏk hơ năn sâm Ngọc Linh Kon Tum vă tĕch tơ mam tơ̆ ‘ngoăih păng tĕch lơ̆m mang tơ pôl. Dêh char vă pơ gơ̆r hơ len năng păng găn pơ đĭ tơ drong ‘nâu.

Dơ̆ng: Tơ blơ̆