VOV4.Bahnar - Pơ gê ‘năr 7/4, tơ̆ pơ lei tơm Kon Tum, Anih pơ gơ̆r Krao hơ vơn plang song pham tơ gŭm dêh char Kon Tum pơ gơ̆r Lêh tơ lĕch jang “ Năr đĭ đăng kon pơ lei plang song pham tơ gŭm sơ năm 2022". Tơ drong jang vă hơ tŏk ‘lơ̆ng đon hlôh vao lơ̆m rim răih kon pơ lei găh tơ drong tơm, tơ drong ‘lơ̆ng hơ iă đơ̆ng “ Plang song pham dŏng bơ ngai”.

Vang plang song pham đơ̆ng rŏng lêh tơ lĕch jang “ Năr đĭ đăng kon pơ lei plang song pham tơ gŭm sơ năm 2022"

Pơ ma tơ̆ Lêh tơ lĕch jang, Phŏ kơ dră Anih vei lăng kon pơ lei dêh char Kon Tum Y Ngọc tơ băt, dôm sơ năm âu ki, tơ drong jang plang song pham tơ gŭm tơ̆ dêh char Kon Tum hlôi jing tơ drong jang ‘mêm mơ nat gĭt kăl, đei lơ lap kon pơ lei vang jang kiơ̆. Hơ drô̆ sơ năm 2021 âu ki, anih jang pơ gang dêh char Kon Tum sơng iŏk đei hloh 5.200 tơ pu pham đơ̆ng bơ ngai plang song pham tơ gŭm. Lăp đơ̆ng rŏng lêh tơ lĕch jang, đei hloh 300 tơ pu pham đei kon pơ lei dêh char Kon Tum plang song tơ gop lơ̆m “ Hơ nih mong pham” pơ yua ăn tơ drong jang kâp kư̆p păng hơ met ăn bơ ngai jĭ.

Thuem: Tơ blơ̆