VOV4. Bahnar - Năr 9/3, tơ̆ pơlei tơm Kon Tum, Kŏng ang dêh char Kon Tum pơgơ̆r Hop akŏm iŏk nơ̆r tơgop ƀar tơdrong vă pơjing Khôi luơ̆t Khŭl bơ̆ jang vei lăng sơđơ̆ng dơ̆ng kơ jăp tơring păng Khôi luơ̆t vei lăng năng tông sơđơ̆ng trong nơnăm trong tĕh.

Khŭl kơdră tang măt vang năm hop akŏm

Vang năm hop akŏm đei ƀok U Huấn, Kơdră jang hmŏ lơ̆m Dơnŏ anĭh chĕp pơgơ̆r Trung ương Đảng, Kơdră chĕp pơgơ̆r Anĭh bơ̆ jang tôm tơdrong lơ̆m dêh char kơ Dơnŏ anih Đảng dêh char, Kơdră chĕp pơgơ̆r Khŭl kơdră tang măt Kuô̆k hô̆i dêh char Kon Tum. Tơ̆ Hop akŏm, rim kơdră tang măt đŏk tơbăt 12 tơdrong tơgop nơ̆r ăn ƀar tơdrong vă pơjing khôi luơ̆t. Iung pơma tơ̆ Hop akŏm, ƀok U Huấn athei, lăp đơ̆ng rŏng Hop akŏm Kŏng ang dêh char hơnơ̆ng atŏk kơtang pơrô̆ pơtho tơbăt ƀar tơdrong vă pơjing Khôi luơ̆t, tơgop pơjing đei lăp mĭnh ƀơ̆r đon, tơgŭm djru đơ̆ng rim bơngai, hơnĭh bơ̆ jang, khŭl jang lơ̆m pơm tơlĕch, pơdrơ̆ng kiơ̆ păng tơlĕch jang kiơ̆ tơdrong vă jang Khôi luơ̆t au.

Tơblơ̆ nơ̆r: Amazưt