VOV4.Bahnar - ‘Năr 8/2, 10 apŭng, pơ lei tơm kơ dêh char Kon Tum pơ gơ̆r lêh tơ lĕch jang pơ jei băl iung jang pơ jing tơ ring tơ rang ‘nao păng anih kơ drơ̆m hơ gei blŭng pơ yan puih mak Nhâm Dần 2022. Lêh tơ lĕch jang tơ drong jang pơ jei băl iung jang pơ jing tơ ring tơ rang ‘nao păng anih kơ drơ̆m hơ gei đei dêh char Kon Tum pơ vei pơ gơ̆r đơ̆ng rŏng Têt Nguyên đán rim sơ năm.

Bơ ngai tang măt vang pơm trong nơ năm đơ̆ng rŏng lêh iung jang blŭng sơ năm tơ̆ kueng kơ phô̆ 5, thị trấn Đăk Hà, apŭng Đăk Hà

Sơ năm ‘nâu tơ drong jang pơ jei băl đei hơ năn: “ Hơ tŏk tơ iung jang sa, hơ met ming anih kon pơ lei oei, pơ jing tơ ring tơ rang ‘nao, anih kơ drơ̆m hơ gei”. Tơ pă yan âu ăn ƀôh gơ nang đơ̆ng đei pơ đĭ khŭl jang chĭnh trĭ păng lơ lap kon pơ lei jang kiơ̆, vang jang hơ drin, truh dang ei dêh char Kon Tum hlôi đei 35 xăh jang đang ‘lơ̆ng tơ ring tơ rang ‘nao, lơ̆m noh đei 3 xăh jang đang xăh tơ ring tơ rang ‘nao ‘lơ̆ng rŏ. Sơ năm 2022 dêh char hơ drin đei dơ̆ng 8 xăh jang đang ‘lơ̆ng tơ ring tơ rang ‘nao.

Thuem: Tơ blơ̆